Fotokollaj: Azattyq Rýhy / Ábilqasym Esentaev
Jalpy, «Qaryzsyz qoǵam» jobasynyń júzege asýyna bank sektorynyń tutynýshylyq nesıemen tym áýestenip ketkeniniń saldary ıtermelep otyr. Halyqty banktiń shyrmaýynan shyǵaryp, qarjylyq saýattylyqqa jeteleıtin mundaı joba jaıynda Memleket basshysy Qasym-Jomart Toqaev byltyrǵy «Ádiletti Qazaqstannyń ekonomıkalyq baǵdary» atty Joldaýynda erekshe atap ótken edi. Sebebi bankter elge shekten tys nesıe úlestirýi saldarynan qarjy júıesin tıtyqtatqan syn-qater kóbeıip, azamattardyń qaryzǵa belshesinen batýyna ákep soqqan edi. 2019 jyly Prezıdent sheshimimen 500 myń azamattyń kepilsiz nesıesi keshirilip, qarjylyq tyǵyryqqa tirelgen tulǵalardyń bankrottyǵy jarııalanǵan. Biraq bul kúrdeli jaǵdaıdy túbegeıli rettemedi.
Ahýaldy birjola túzeý úshin tyń júıeli sharalar qabyldaý qajettigin aıtqan Prezıdent byltyrǵy Joldaýynda azamattardyń qarjylyq saýatyn arttyrýdyń mańyzdylyǵyna el nazaryn aýdaryp, «Amanat» partııasynyń «Qaryzsyz qoǵam» jobasyn erekshe atap ótken-di.
Joǵaryda atalǵan Tarazdaǵy semınarda Tehnıkalyq jáne kásiptik bilimi damytý ortalyǵynyń ádiskeri Asıma Pernebaeva, «Amanat» partııasy oblystyq fılıaly tóraǵasynyń orynbasary Ýálıhan Bolatbek, M.H.Dýlatı atyndaǵy Taraz óńirlik ýnıversıteti «Qarjy jáne esep» kafedrasynyń meńgerýshisi, ekonomıka ǵylymdarynyń kandıdaty Aıgúl Moldabekova Joldaýda aıtylǵan maqsat-mindetterge toqtalyp, óz tájirıbelerimen bólisti. Jıynda sóz alǵan Ýálıhan Bolatbek sanany turmys bılegen búgingideı qoǵamda azamattardyń qarjylyq saýatty bolǵany durys degen pikirdi alǵa tartty.
«Bıyl joba aıasynda turǵyndardyń qarjylyq saýatyn arttyrý maqsatynda 8 500 adamdy oqytýdy josparladyq. Búginge deıin 7 myńǵa jýyq turǵynnyń qarjylyq saýatynyń artýyna úlesimizdi qostyq. Endi jobanyń kelesi kezeńine ótemiz. Iаǵnı oqýshylar men stýdentter oqytylady. Osy maqsatta 4 pedagog Astana qalasynda bilimin jetildirip kelip, oqý oryndarynyń ustazdaryn oqytýdy bastady. Bul mamandar jańa oqý jylynan bilimgerlerge qarjylyq saýattylyq kýrstaryn júrgizedi», dedi Ýálıhan Bolatbekuly.
Uıymdastyrýshylardyń aıtýynsha, semınardyń birinshi kezeńinde 36 adam oqytylsa, kelesi kezeńinde de sonsha pedagog bilimin jetildirmek. Al semınarǵa qatysýshylar pikir almasý kezinde qarjyny tıimdi basqaryp, jalpy shyǵyndardy eseptep, júıeleýdi, alaıaqtyq áreketterdiń belgileri men shemalaryn jáne olardan qutylý joldaryn úırenip, qarjylyq saýatyn arttyra alǵanyn jetkizdi.
