Tárkilengen esirtkiniń úshten ekisi sıntetıka bolyp otyr. Naqtyraq aıtqanda, jyl basynan beri anyqtalǵan 149 esirtki faktisiniń 97-si sıntetıkalyq esirtki satýǵa qatysty bolsa, 73-i osy esirtki zattaryn satý faktisi. Máselen, mamyr aıynda Petropavl qalasynda PD esirtki qylmysyna qarsy is-qımyl basqarmasynyń qyzmetkerleri «BMW» kóligine mingen úsh kúdiktini ustady. Keıin anyqtalǵanyndaı, 23 jastaǵy júrgizýshi Almaty qalasynyń turǵyny bolyp shyqty. Ol polısııa qyzmetkerleriniń toqta degen belgisine baǵynbaı, kóligimen qashyp, jasyrynýǵa tyrysqan. Sońynan qýǵan kezde kóliktiń ishinde otyrǵandar terezeden qara tústi barsetkany syrtqa laqtyryp jibergen. Alaıda tártip saqshylary túıinshekti taýyp alǵanda ishinen shamamen salmaǵy 1 kılo bolatyn untaq zat shyqqan. Saraptama qorytyndysyna sáıkes, bul α-PvP dep atalatyn sıntetıkalyq esirtki ekeni anyqtaldy.
Kúdiktilerdiń ózderi de alysqa uzamady, olardyń kóligi «Jumysshy» kentinen shyǵa beristegi aınalma jolda toqtatyldy. Salonda júrgizýshiden basqa 35 jastaǵy taǵy bir almatylyq jáne Astana qalasynda turatyn 24 jastaǵy qyz bolǵan. Bulardyń turaǵy Kókshetaý qalasynda ekeni anyqtalǵan soń soltústikqazaqstandyq jedel ýákilder olardyń qaladaǵy jaldamaly páterinen sıntetıkalyq esirtki salynǵan túıinshekter, elektrondyq tarazy, býyp-túıý materıaly, 1 kılo sıntetıkalyq esirtki, sondaı-aq 20 gr gashısh tárkiledi.
«Tárkilengen esirtkiniń jalpy salmaǵy 1,5 kılo α-PvP jáne 0,5 kılo «mefedron» bolǵanyn anyqtadyq», deıdi PD esirtki qylmysyna qarsy is-qımyl basqarmasy basshysynyń mindetin atqarýshy, polısııa maıory Rýslan Úmbetov. Qazir kúdiktilerdiń ústinen qylmystyq tergeý júrgizilip jatyr. Olar 15 jylǵa deıin bas bostandyǵynan aıyrylýy múmkin. Al úshtikten tárkilengen esirtkiniń kólemi buryn-sońdy bolmaǵan asa úlkeni bolyp esepteledi.
Aımaqta esirtkige qarsy kúreste túrli aksııa men konkýrs, kezdesýler ótkiziledi. Osy jyldyń 7 aıynda nashaqorlyqtyń aldyn alý boıynsha 563 is-shara uıymdastyrylyp, oǵan 35 myńnan asa oqýshy men stýdent, sondaı-aq 6637 áskerı qyzmetshi qatysqan. Bul jumystyń barlyǵy jastardyń esirtkige qarsy ımmýnıtetin qalyptastyrýǵa baǵyttalǵan. Jasóspirimderge esirtkini, ásirese sıntetıkalyq esirtkilerdi paıdalanýdyń orny tolmas saldary týraly aıtyldy.
«Esirtkiniń taralýyna qarsy kúres – polısııa qyzmetiniń basty basymdyqtarynyń biri. Jedel ýákilder esirtkiniń zańsyz aınalymynyń jolyn kesýge ǵana emes, esirtki jarnamasyn, tyıym salynǵan zattardy satatyn ınternet dúkenderdi, esirtki kýrerlerin tartatyn resýrstardy anyqtaýǵa jáne buǵattaýǵa nazar aýdarady. Qańtar aıynan beri osyndaı 48 resýrs buǵattaldy. О́ńirimizdiń belsendi azamattary kúmándi adamdar týraly aqparatty t.me/sko_narkohelp_bot esirtki qylmysyna qarsy is-qımyl basqarmasynyń Telegram-botyna habarlaıdy. Qazir oblys turǵyndarynyń polısııaǵa habarlaǵan eki ótkizý faktisi boıynsha tekserý júrgizilip jatyr», deıdi Rýslan Úmbetov.
Soltústik Qazaqstan oblysy
