Powerful nomad. Kúshtilerdiń saıysy da Dúnıejúzilik dodanyń baǵdarlamasyna engen bul sport túrinen ár elden bir sportshy, bir bapker, bir tóreshi jáne bir komanda jetekshisi qatysady. Tolaǵaılardyń tartysyna qatysatyn balýandardyń jasy 18-den asýy mindetti jáne salmaǵy 90 kılodan joǵary bolýǵa tıis. Dúnıejúzilik kóshpeliler oıyndarynda kúshtilerdiń saıysyna qatysatyn alyptar aldymen 100 kg tartatyn tasty 10 metrge deıin kóterip ótýi kerek. Sodan keıin 100 kg qapty ıyǵyna artyp otyryp turýǵa tıis. 10 kg salmaǵy bar naızany bir qolymen qashyqtyqqa laqtyryp kúshin synaıdy. Odan keıin 130 kg tartatyn jýan bóreneni kóterip otyryp turady. 200 kg júk tıelgen arbany qashyqtyqqa súırep te qaıratyn kórsetedi.
Etnosport oıyndarynyń baǵdarlamasyna alǵash ret engizilgen saıystyń maqsaty – el ishindegi atan jilik, apaıtós erlerdiń eren kúshin nasıhattaý, talanttardy halyqqa tanystyrý. «Tolaǵaı» alyptar saıysynyń negizin qalaýshy Temir Spataev etnosport alamanynda orasan kúshtiń ıeleri de óz ónerlerin pash etip qana qoımaı, babalarymyzdyń rýhyn da áıgileıtinin aıtady.
«Keshegi Qajymuqan, 815 kg tartatyn tasty kótergen Balýan Sholaqtaı alyptardyń búgingi izin jalǵar izbasar urpaǵynyń bar ekenin pash etkimiz keledi. Dúnıejúzilik kóshpeliler oıyndarynda tolaǵaılar arbany qum ústinde súıreıdi, kisiniń qulashy ázer jetetin jýan bóreneni ıyǵyna salyp, ýaqytqa jarysady. Etigimen sý keship, er ústinde kirpik ilmeı, elimizdiń tynyshtyǵyn, jerimizdiń bútindigin kúzetken batyr babalarymyzdyń rýhyn áıgileý maqsatynda naıza laqtyrý synyn da saıys baǵdarlamasyna qostyq. Salmaǵy 10 kılo tartatyn naızany qulashtaı alysqa sermeý de orasan kúshti talap etedi. Astana qalasynda ótetin saıysqa birneshe elden sportshylar qatysyp, ózderiniń boıyndaǵy samdaǵaılyǵyn kórsetedi. Elimizden qatysatyn balýandardy irikteý birneshe kezeń boıynsha ótip, kil myqtynyń arasynan shyn myqtylar sýyrylyp shyqty. Endi olar kóshpeliler oıyndarynda el atynan dodaǵa túsedi», dedi T.Spataev.
Kúshtilerdiń alamany «Qazanat» atshabarynyń mańynan boı kóteretin «Kóshpeliler ǵalamy» etnoaýlynda 11 qyrkúıekte ótedi. Dúbirli dodaǵa Ispanııa, Qytaı, Oman, Belarýs, Armenııa, Pákistan, Úndistan, Tájikstan, Qyrǵyzstan, Kýveıt, Reseı, О́zbekstan elderinen sportshylar qatyspaq.
