Foto:Ashyq derekkóz
Úkimet otyrysynda kún tártibinen tys jańa maımyl sheshegi vırýsy máselesi qaraldy.
Premer-mınıstr ázirge alańdaýǵa negiz joq ekenin, alaıda arqany keńge salýǵa bolmaıtynyn atap ótti.
«Kórip otyrǵanymyzdaı, ázirge alańdaýǵa esh negiz joq. Qazaqstanda qaýipti indetti juqtyrýdyń birde-bir jaǵdaıy tirkelgen joq. Alaıda arqany keńge salýǵa bolmaıdy. Densaýlyq saqtaý mınıstrligi ahýaldy ári qaraı baqylaýda ustap, juqpaly aýrýdyń el aýmaǵynda taralý qaýpin boldyrmaý boıynsha aldyn alý sharalaryn qabyldasyn. Bul ásirese, áýejaılar men shekaradaǵy ótkizý beketterine qatysty», dedi Oljas Bektenov.
Densaýlyq saqtaý vıse-mınıstri Erjan Nurlybaev búgingi tańda Qazaqstanda epıdemıologııalyq jaǵdaı turaqty, sırek juqpaly aýrýdy juqtyrý jaǵdaıy tirkelmegenin aıtty.
«Qazaqstan Respýblıkasy aýmaǵynda indettiń paıda bolý qaýpi az. Osyǵan qaramastan, mınıstrlik bul ınfeksııanyń taralýyna jol bermeý úshin barlyq qajetti aldyn alý sharalaryn qabyldap jatyr. Memlekettik shekara arqyly ótkizý beketterinde sanıtarlyq-karantındik baqylaý kúsheıtildi. Atalǵan ınfeksııaǵa kúdikti naýqastar ákelingen jáne anyqtalǵan jaǵdaıda, jaǵdaıdyń ýshyǵýynyń túrli ssenarııleri boıynsha Medısınalyq qyzmetterdiń is-qımyl algorıtmderi ázirlendi. Dárilik zattar qorynyń qajetti kólemin qalyptastyrý sharalary qabyldandy. Medısına qyzmetkerlerin dıagnostıka jáne emdeý ádisterine oqytýdyń qaıtalama sıklderi jergilikti jerlerde júrgiziledi. Bas memlekettik sanıtarlyq dárigerdiń qaýlysy jáne tótenshe jaǵdaılar kezindegi ulttyq is-qımyl jospary daıyndaldy. Jaǵdaı Densaýlyq saqtaý mınıstrliginiń turaqty baqylaýynda», dedi Erjan Nurlybaev.
