Foto: Aqorda
Memleket basshysy, eń aldymen, «Astana arena» stadıonyn aralap kórdi. Munda halyqaralyq sporttyq-mádenı is-sharanyń ashylý saltanaty ótedi. Otyz myń kórermen erkin syıatyn stadıonǵa jyl boıy kúrdeli jóndeý júrgizildi. Qazirgi kezde abattandyrý jumystary aıaqtalyp, jabdyqtary tolyqtaı jańartyldy.
Qasym-Jomart Toqaevqa «Qazaqstan» jeńil atletıka kesheninde ornalasqan Akkredıtteý ortalyǵynyń jumysy, Kóshpeliler oıynyna qatysatyn ulttyq quramanyń kıim úlgisi tanystyryldy. Halyqaralyq is-sharaǵa 1500 erikti tartylady.
Sport jáne týrızm mınıstri Ermek Marjyqpaev Ulttyq quramanyń ázirligi jóninde baıandady. Onyń aıtýynsha, osy ýaqytqa deıin halyqaralyq jáne respýblıkalyq deńgeıde 42 oqý-jattyǵý jıyny ótken. Sondaı-aq sportshylar 7 halyqaralyq jáne 25 respýblıkalyq týrnırge qatysqan.
Jalpy V Dúnıejúzilik kóshpeliler oıyndaryna álemniń 89 elinen 2800 qatysýshy men resmı delegasııa músheleri keledi. Saıystyń 21 túrinen 97 medal sarapqa salynady. Negizgi jarystar «Astana-arena» stadıony, «Qazanat» ıppodromy, «Alaý» muz saraıy, Jaqsylyq Úshkempirov atyndaǵy Jekpe-jek saraıy, «Dýman» qonaq úı-sport kesheninde ótedi. Al jamby atý men teńge ilýge arnaıy alań jasaqtalǵan.
Halyqaralyq doda aıasynda 150-den astam mádenı is-shara josparlanǵan. Máselen, Etnoaýylda Kóshpeliler mádenıeti mýzeıi, qolónershiler jáne músinder kórmesi, al Ulttyq mýzeıde «Kóshpendi halyq: tarıh, tanym, taǵylym» atty halyqaralyq ǵylymı-praktıkalyq konferensııa uıymdastyrylady.
Aldyn ala boljamǵa sáıkes, osy kúnderi elordaǵa 100 myńǵa jýyq týrıst kelýi múmkin. Osyǵan oraı 20-dan astam qonaq úıdiń, sondaı-aq týrıster jıi baratyn oryndardyń daıyndyǵy pysyqtalyp, qala kóshelerin abattandyrý, bezendirý jumystary qarqyndy júrgizilip jatyr.
