Reseıde joǵary belsendilik tanytyldy

Máskeýdegi Qazaqstannyń Reseıdegi elshiliginiń rezıdensııasynda orna­lasqan №215 saılaý ýchaskesinde Qazaqstan Respýblıkasy Prezıdentiniń kezekten tys saılaýy ótti. Osynda óz azamattyq jáne konstıtýsııalyq quqyǵyn oryndaý úshin Reseıdiń birqatar aımaqtarynan azamattarymyz kelip daýystaryn berdi, dep habarlady Qazaqstannyń Reseıdegi elshiliginiń baspasóz qyzmeti. «Máskeýden basqa, Reseıdiń – Sankt-Peterbýrg, Qazan, Omby jáne Astrahan qalalarynda ornalasqan elimizdiń kon­sýldyq mekemelerinde de saılaý ýchas­keleri ashyldy. Saǵat 13:00-ge deıingi málimetke sáıkes, Reseı aýmaǵy boıynsha negizgi tizimge tirkelgen 3000-ǵa jýyq Qazaqstan azamattarynyń 2 152-si, shamamen 72%-y daýys berip boldy. Osy málimetke súıener bolsaq, atalmysh eldegi saılaý úderisi belsendi ótýde», dedi Qazaqstannyń Reseıdegi elshiliginiń keńesshi-ýákili, saılaý ýchas­ke­siniń tóraǵasy Vıktor Temirbaev. Onyń aıtýy boıynsha, kelgen azamattar sabyr­ly jáne uıymdasqan túrde daýys bergen. Reseı elordasynda daýys berip úlgirgender arasynda – Qazaqstan el­shiliginiń dıplomattary, QR Saýda ókildiginiń jáne Eýrazııa ekono­mıka­lyq odaq komıssııasynyń (EAEOK) qyzmetkerleri, Máskeýdegi QR ult­tyq kompanııalar ókilderi, Máskeý joǵary oqý oryndarynyń, áskerı meke­me­le­riniń stýdentteri men kýrsanttary bar. EAEOK-tyń ekonomıka jáne qarjy saıasatyna jaýapty múshesi (mınıstr) Tımýr Súleımenov ózi daýys berip bolǵan soń, saılaýǵa qatysý ol azamattyq borysh jáne ony der kezinde oryndap otyrý qajet, dep atap aıtty. «Men búgin Ata Zańmen bekitilgen quqyǵymdy oryndaý úshin Smolenski­den arnaıy keldim», dedi Smolensk Áskerı akademııasynyń kýrsanty Se­rik Jeksenbekov. «Búgin barlyq elimiz úshin asa ma­ńyzdy kún jáne meniń pikirim boıynsha elimizdiń ár azamaty qaı jerde bolsa da saılaýǵa qatysýy tıis», dedi Áskerı derıjerlar ınstıtýtynyń kýrsanty – Ádı Qabdyrahmanov. Máskeýdegi ýchaskege Uly Otan so­ǵysynyń ardageri Andreı Syký­novtyń kelgenine BAQ ókilderi erekshe nazar aýdardy. «Men Shyǵys Qazaqstannyń Shemo­naıha aýmaǵynda dúnıege keldim. Ákem soǵysta qaıtys boldy. Sodan keıin men soǵysta qaza tapqan mıllıondaǵan otandastarym úshin kek alamyn degen oımen jaıaý ásker toby quramynda shaıqastym. Qazaqstan jalpyǵa ortaq – Uly Jeńiske eleýli úles qosty. Oqtar­dyń jartysy týǵan respýblıkamda jasalǵany belgili. Barlyqtaryn kele jatqan jarqyn mereke Uly Jeńis kúnimen shyn júrekten quttyqtaımyn! Men búgingi kúni Reseı astanasynda saılaý quqyǵymdy oryndaǵanyma óte rızamyn. Qazaqstannyń odan ári damýyna, bıik jetistikterge jete berýine shynaıy tilektespin», dedi ardager. Halyqaralyq baıqaýshylar Más­keýde ótip jatqan saılaý úderisiniń uıymdastyrylýyna joǵary baǵasyn berýde. TMD Parlamentaralyq assam­bleıa­sy taldaý basqar­ma­synyń keńesshisi Vadım Beketov «TMD-ǵa qatysýshy memle­ket­ter­diń Par­lamentaralyq assambleıa­sy atynan halyqaralyq baıqaý­shy­lar №215 saılaý ýchaskesin­de monıtorıng júr­gizdik, is-sharaǵa daıyn­dyqtyń joǵary deńgeıin atap ótý qajet», dep málimdedi. Qazaqstannyń Reseı Federasııasyndaǵy elshiliginiń baspasóz qyzmeti.