Oblys ákiminiń orynbasary Jasulan Bısembıevtiń aıtýynsha, 2017 jyldan beri mektep túlekterine ákim granty berilip keledi. Bilim granty jergilikti bıýdjet esebinen qarjylandyrylady.
«Qazir ákim grantymen atyraýlyq 357 stýdent elimizdegi medısınalyq joǵary oqý oryndarynda bilim alyp júr. Bıyl alǵashqy 25 jas joǵary oqý ornyn bitiredi. Olar bilimin rezıdentýrada jalǵastyrmaıtyn bolsa, óńirge oralady. Grant ıelerine qoıylatyn negizgi talap – oqý ornyn aıaqtaǵannan keıin óńirdegi memlekettik mekemelerde keminde 3 jyl jumys isteý», deıdi Jasulan Bısembıev.
Onyń aıtýyna qaraǵanda, oblys ákiminiń grantyn berýdiń ózindik tártibi bar. Birinshiden, bul memlekettik bilim grantyn ıelene almaǵan talapkerlerge arnalǵan. Ekinshiden, ákim grantyn alý úshin ótkiziletin konkýrsqa mektep jáne kolledj túlekteri qatysty. Úshinshiden, ákim granty kadr tapshylyǵyna baılanysty suranys negizinde bólinedi. Basty talap – mamyr-maýsym aılaryndaǵy Ulttyq biryńǵaı testileý qorytyndysymen erejege sáıkes qujattardy tapsyrý.
Oblystyq bilim basqarmasynyń baspasóz qyzmeti málim etkendeı, ákim grantymen oqyǵan stýdentter joǵary oqý ornyn bitirgennen keıin jaýapty mekemeniń bergen joldamasymen jumysqa ornalasa alady. Al bıyl bilim grantyn bólý kezinde medısına, pedagogıka, aýyl sharýashylyǵy, veterınarııa, orman resýrstary jáne orman sharýashylyǵy, dintaný, týrızm baǵytyndaǵy mamandyqtarǵa basymdyq berilip otyr.
Máselen, pedagogıka, beıneleý óneri, kórkem eńbek, mýzykalyq bilim, veterınarııa, dene shynyqtyrý, sport, týrızm jáne servıstik qyzmet mamandyǵynyń grantyn ıelengenderge H.Dosmuhamedov atyndaǵy Atyraý ýnıversıtetinde oqýyna jol ashyldy. Ákim grantynyń basym bóligi adam janyna arashashy bolatyn medısına salasynyń mamandaryn daıarlaýǵa bólindi. Endi atyraýlyq 84 túlek Astana, Almaty, Qaraǵandy, Aqtóbe qalalaryndaǵy medısına ýnıversıtetinde jalpy medısına mamandyǵymen joǵary bilim alady. Al dintaný, teologııa mamandyǵy úshin berilgen grant ıeleri Nur-Múbarak Egıpet Islam mádenıeti ýnıversıtetiniń stýdenti atandy.
Atyraý oblysy
