Berlın, Nıý-Iork jáne Almaty qalalarynda alma-kezek ómir súrip, úsh eldiń arasynda jumys isteıtin almatylyq sýretshi úshin onyń jańa týyndylary 2016 jylǵy «Men kóshpendimin» kórmesinde usynylǵan mýltımedııalyq ınstallıasııalarynyń ıdeıasymen ózektes. Shyndyqty ishki túısikpen qabyldaýdan jáne onyń tujyrymdamalyq taldaýynan basqa, Nargıs óziniń jańa jumystarynda matematıka men mýzyka salasyndaǵy zamanaýı zertteýlerdi biriktiredi. Onyń Shyǵys oıý-órnekteriniń geometrııalyq qurylymdarynyń qaınar kózin, olardyń tereń maǵynasyn izdep, shyǵarmashylyǵyna arqaý etýi – sýret ónerindegi tyń tásil. Sýretshiniń bul izdenisi dástúrli oıý-órnekterge ózgeshe reńk berip, kóshpelilerdiń ejelgi mádenıetinen shabyttanǵan óner týyndylarynda jańa keıippen jalǵasyn taýyp, ishteı sabaqtasyp jatyr. Myńjyldyqtar dáýirin bastan keshken qazaqtyń dástúrli oıý-órnegi men tańbalarynan qazyna, tuspal, kod, shıfr izdegen sýretshi ulttyq uǵymdy tereńdetip, qylqalam qudiretimen onyń adam ómirine áserin baıandaıdy.
Tutas qabyrǵanyń jartysyna ilingen «Geometrııa dybystary» toptamasyna jatatyn shyǵarmalary tamashalaǵan jandy az-kem aıaldatady. Sýretterde avtor akkordtar men dybys rettiliginiń araqatynasyn sıpattaıdy. Iri núktelermen kómkerilgen «Kenep» kartınasy bıdaıdyń tógilgen altyn dánin eske salady. Al «Men – daýyspyn» atty týyndysy Morzeniń álippesi sekildi, biraq zamanaýı kompıýter baǵdarlamasynyń mazmunyn ashqan sıfrlar sekildi belgili bir órnektiń negizin sandar tizbegimen aıqyndaıdy.
«Bul kórmede Nargıs óziniń «originem» – sıfrlyq jańa týyndylar serııasyn usyna otyryp, parallel júrgizip, ejelgi oıý-órnekter maǵynasynyń tereńdigine súńgitip, óz aýdıtorııasyna olardyń uǵymyn qaıta bezbendeýdi usynady. «Evigilatio» ónerdiń mazmunyn bógde adamdardyń aralasýynsyz ashyp, kórermendi jumbaq qubylystardyń qupııasyna boılatyp, búgingi qalyptasqan túsinikter mániniń múlde basqada ekenin meńzeıdi» deıdi kórmeniń kýratory G.Jubanova.
ALMATY
