Senator qazirgi tańda elimiz damýdyń jańa kezeńine qadam basqanyn atap ótti. Barlyq memlekettik qurylym ózderine júktelgen mindetterdi oryndaýmen birge el saıasatynyń negizgi baǵytyn iske asyrý aıasynda da aýqymdy jumys atqaryp keledi. Memleket basshysy Qasym-Jomart Toqaev Atyraýda ótken Ulttyq quryltaıdyń úshinshi otyrysynda jańa kezeńdegi ıdeologııalyq negizdi aıqyndap berdi. Ol «Ádiletti Qazaqstan» tujyrymdamasynyń negizgi qaǵıdatyna aınalǵan «ádildik» uǵymyna taban tireıdi.
Sonymen qatar depýtat memleket qoǵamnyń ósip-órkendep, jańa, jarqyn bolashaqqa qadam basýy úshin barlyq jaǵdaıdy jasaıtynyn, bul rette jasandy ıntellektini engizip, damytý máselesi de ózekti ekenin aıtty.
«Jasandy ıntellekt degenimiz – eshqandaı qııal emes, qazirgi kezde qajettilikke aınalǵan mańyzdy tetikterdiń biri. Osy tehnologııanyń arqasynda aıtarlyqtaı jetistikke qol jetkizýge bolady. Sondyqtan Prezıdentimiz Qasym-Jomart Toqaev medısına, qorǵanys, ǵaryshtyq zertteýler salalarynda jáne basqa da basym baǵyttarda mańyzdy ról atqaratyn joǵary ónimdi sýperkompıýter qurastyrýdy tapsyrdy», dedi Nurtóre Júsip.
Sondaı-aq senator qoǵamdyq kelisim men ulttyń birligin nyǵaıtý jolynda memlekettik tildi damytýdyń asa mańyzdy ekenin jáne el Prezıdenti qazaq tiliniń mártebesin arttyryp, ony damytýǵa basa mán berip otyrǵanyn atap ótti.
«Prezıdentimiz qazaq tiliniń rólin kúsheıtý máselesin birneshe ret kóterip, ýaqyt óte kele ol ultaralyq qatynas tiline aınalýǵa tıis ekenin aıtty. Bul strategııany iske asyrý aıryqsha mańyzǵa ıe. О́ıtkeni búginde qazaq tili jańa sıpat alyp, Qazaqstanda da, odan tys jerlerde de suranysqa ıe bola bastady. Álemdik qoǵamdastyqtyń bizdiń tilimizge, mádenıetimizge jáne turmysymyzǵa degen qyzyǵýshylyǵynyń artýy – Memleket basshysy júrgizip otyrǵan ashyqtyq pen dıplomatııa saıasatynyń nátıjesi. Osy rette búgingi is-shara da memlekettik tildiń rólin kúsheıtý jolynda jasalǵan mańyzdy qadam ekeni anyq», dedi Nurtóre Júsip.
