Erekshe belsendilik tanytyldy

Tańbozynan bir baıqaǵanym, bıylǵy saılaýda úlken erekshelik bar sekildi... Qazir Almatyda qustyń qanatymen kelgen sulý kóktem. Sol kóktemmen birge ertemen saıraǵan bulbul únin kúnde estımiz. Ǵajap áýen! Al, búgin bulbuldyń názik únine merekelik án men kúı qosylyp, qala kósheleri men baýlary bir shadyman shattyqqa ulasyp ketipti. Almaty túgel án salyp turǵandaı. Tabıǵat ta dúr silkinip, qulpyra jasanyp ketken. Mereke dep, minekı, osyny aıt! Eń bastysy – bıylǵy saılaý­shylardyń kóńil-kúıleri de arý kóktemdeı kóterińki ekenin baıqadyq. Sodan ba, olar ózgeshe belsendilik tanytýda. Tipti bizdiń ýchaskede saılaýshylardyń kóptiginen qaıta-qaıta kezekke turyp qalyp jatyr. Keıbir adamdardy sózge tartyp, syr aqtaryp, áńgimelesip te kórdik. Sodan uqqanym mynaý boldy... Birinshiden – saılaýshylardyń saıası kózqarasy aıqyn, tuǵyry nyq, ózderiniń azamattyq paryzyn, bıik jaýapkershilikterin jaqsy túsinedi. Ekinshiden, «turaqtylyq, tatýlyq, qoǵamdyq kelisim» degen sózderdi Elbasy Táýel­sizdigimizdiń birinshi kúni­nen beri tanbaı aıtyp kele jatqanyn bilemiz. Nesin jasyramyz, keıde osy sózder ábden yǵyr bolǵandaı kórinip ketetini bar. Endi qarańyz, osy bir qarapaıym sózderdiń máni men mańyzyn, aqıqaty men shyn­dyǵyn sońǵy jyldary qazaqstandyqtar durys túsinip, tereńnen paıymdaǵandaı. Oǵan sebep – irgedegi kórshi elderde bolyp jatqan alýan oqıǵalar bolsa kerek. Ásirese, Ýkraınadaǵy qantógis qazaqstandyqtarǵa, ásirese, qazaq aǵaıynǵa zor sabaq boldy. Ýkraınadaı alpaýyt memleketti torǵaıdaı tozdyrǵan jaǵdaı – bizdiń azamattardy uıqysynan serpilgendeı kúıge túsirdi, oı tastady. Táýelsizdik te, eldiń taǵdyry, jerdiń tutastyǵy da – abaı bolmasań, ustaranyń júzindeı názik másele ekenine kózderi ábden jetti. Sondyqtan bul jaǵdaı halqymyzdy qoǵamdyq tatýlyq pen birlikke shaqyryp, Elbasynyń mańaıyna odan ári tyǵyz toptasa túsýine sebepshi bolýda. Jurtshylyqtyń bıylǵy saılaýǵa erekshe belsendilik tanytýynyń úlken syry osynda degen oıdamyn. Álibek ASQAROV, jazýshy, Memlekettik syılyqtyń laýreaty.