Jelidegi aqparatta 15 qyrkúıekten bastap elimizde maska taǵý rejımi engizilip, oqýshylar qashyqtyqtan oqýǵa jiberiletini aıtylǵan.
QR Sanıtarlyq-epıdemıologııalyq baqylaý komıteti bul aqparatqa qatysty pikir bildirdi.
«Messendjerlerde 15 qyrkúıekten bastap balalardy qashyqtan oqytýǵa jiberedi jáne mekemelerde maskamen júrý rejımi engiziledi degen aqparat shyndyqqa janaspaıdy. Jyl saıyn epıdemııalyq maýsym kezeńinde profılaktıkalyq jáne epıdemııaǵa qarsy is-sharalardy ótkizýdi kózdeıtin QR Bas memlekettik sanıtarııalyq dárigeriniń qaýlysy bekitiledi. Qaýlyǵa sáıkes, bıylǵy jyldyń 15 qyrkúıeginen bastap tumaýǵa qarsy vaksınasııa júrgizý bastalady. Maska taǵý rejımi tek medısınalyq uıymdardyń qyzmetkerleri úshin ǵana engiziledi», - delingen habarlamada.
Qaýlymen tolyǵyraq QR DSM Sanıtarııalyq-epıdemıologııalyq baqylaý komıtetiniń saıtynda myna silteme boıynsha tanysýǵa bolady.
«Barlyq azamattardy resmı aqparat kózderindegi senimdi aqparatqa senýge shaqyramyz», – delingen QR Sanıtarlyq-epıdemıologııalyq baqylaý komıteti baspasóz qyzmetiniń habarlamasynda.
