Kollajdy jasaǵan – Qonysbaı ShEJIMBAI, «EQ»
Kereký óńirin gazdandyrý máselesin budan eki jyl buryn Memleket basshysy Qasym-Jomart Toqaev Úkimetke tapsyrǵan bolatyn. Aımaq jurtshylyǵymen kezdesýinde Prezıdent ónerkásipti damytý qorshaǵan ortaǵa aýyr júkteme túsiretinin atap ótken. Sebebi Pavlodar oblysynda elimizdegi zııan shyǵaryndylardyń úshten biri shyǵady. Bul – jyl saıyn shamamen 700 myń tonna.
«Kúndelikti eńbegi búkil eldiń ındýstrııalyq ósýiniń negizi sanalatyn óńir turǵyndary týǵan ólkeniń qorshaǵan ortasynyń jaı-kúıine qatty alańdaıdy. Ekologııalyq jaǵdaı – azamattardyń ómir súrý sapasynyń mańyzdy kórsetkishi. Sondyqtan óndiristik áleýetti kúsheıtý men ekologııany qorǵaý arasyndaǵy tepe-teńdikti saqtaý óte mańyzdy. Eske sala keteıin, Qazaqstan 2060 jylǵa qaraı kómirtegi beıtaraptyǵyna qoljetkizý nıetin jarııalady», degen edi Memleket basshysy.
Prezıdent aıtqandaı, Úkimet aımaqty gazben qamtamasyz etý joldaryna basymdyq berýi kerek. Bul jasyl damý kún tártibin tolyq júzege asyrýǵa jáne naqty turaqty damýǵa baǵyttalǵan mańyzdy qadam bolady.
Bıyl óńirlik energetıka jáne turǵyn úı-kommýnaldyq sharýashylyq basqarmasy Pavlodar oblysyn gazdandyrý máseleleri boıynsha jumys tobyn qurýǵa bastamashy boldy. Kógildir otyn júıesi barlyq on aýdan men úsh qalany qamtıdy dep josparlanyp otyr.
Áýel basta Pavlodar qalasy men tórt aýdandy ǵana gazdandyrý josparlanǵan edi. Jumys toby máseleni saralaı kele, barlyq aýdan-qalany júıege qosýdy naqtylady. Jobanyń jobalyq-smetalyq qujattamasy ázirlenbegen, soǵan oraı júıeni tartý, engizýdiń qansha somaǵa túsetinin aıtý múmkin emes deıdi jaýapty vedomstvo ókilderi.
«Aımaqta tabıǵı gaz ben gaztaratqysh jeliler joq. Oblystyń iri eldi mekenderin gazdandyrý keıingi jyldary respýblıkalyq deńgeıde kóterile bastaǵan. Bıyl bizdiń basqarma Pavlodar oblysyn gazdandyrý máseleleri boıynsha jumys tobyn qurýǵa bastamashy boldy. Jumys tobynyń quramyna Energetıka mınıstrliginiń, jergilikti atqarýshy organdardyń, «QazaqGaz» UK» AQ jáne «KATEK» JShS jobalaý-zertteý kompanııasynyń ókilderi kirdi. Sáýir aıynda ótken alǵashqy otyrysta olar gazdy tutynýdyń boljamdy kólemin talqylady», deıdi óńirlik energetıka jáne turǵyn úı-kommýnaldyq sharýashylyq basqarmasynyń basshysy Erjan Imanzaıyp.
О́ńirdi gazdandyrýdyń boljamdy merzimi – 2030 jyl. Bul merzimge deıin joba jan-jaqty pysyqtalyp, qajet qarajat kózi de tabylyp qalady degen senim zor. Jergilikti energııa júıesiniń mamandary kógildir otyn kelse, Pavlodar qalasynyń ekologııalyq máseleleri sheshimin tabady degen senimde. Shahardyń qaq ortasynda ornalasqan jer úıler qys boıy pesh jaqqanda qalanyń biraz aýmaǵy kók tútinge bógip jatady. Al gaz jetse, bul úılerdiń barlyǵy kógildir otyndy paıdalanar edi. Esesine jergilikti aýa da tazara túsedi.
Buǵan qosa qazirgi ýaqytta óńirde elektrmen jabdyqtaý jelilerin qaıta jańartý jáne jańǵyrtý boıynsha 2025–2026 jyldarǵa arnalǵan Jol kartasy ázirlenip jatyr. Jol kartasyn iske asyrý 80 eldi mekenge nemese 98 myń tutynýshyǵa áser etpek. Jelilerdiń tozýyn azaıtý maqsatynda jyl saıyn oblystyń energııa berýshi kásiporyndary elektr jelilerin qaıta jańartý, jańǵyrtý, kúrdeli jáne aǵymdaǵy jóndeý jumystaryn atqaryp keledi. Qosalqy stansalardyń elektr jabdyqtary boıynsha ınvestısııalyq is-sharalar da jyl saıyn júrgiziledi. Alaıda bul jetkiliksiz. Mamandardyń sózinshe, josparly jóndeý sharalary tozý kórsetkishin qýyp jete almaı otyr.
Jol kartasyn iske asyrý nátıjesinde aýdandardaǵy apattyq óshirýler sany 1042 jaǵdaıǵa nemese 40 paıyzǵa azaıady dep kútilip otyr.
Pavlodar oblysy
