Kitapta T. Qanaevtyń sózine jazylǵan 52 án men avtordyń ózi shyǵarǵan kúıleri engizilgen. Alǵashqy betterinde Turǵanbek Qanaev jazǵan ǵumyrnamasy, Nartaı aqynnan, Maılyqoja aqynnyń nemere inisi Aıtqoja aqynnan, elimizge belgili shertpe kúıdiń sheberi Tólegen Mombekovten bata alǵan sátteri, óner jolyndaǵy jetistikteri baıandalǵan.
«Shardaradan shyrqalǵan ánder» jınaǵy – Turǵanbek Qanaevtyń tórtinshi kitaby. Buǵan deıin «MERS» preparatynyń tıimdiligi týraly ǵylymı negizde jazylǵan alǵashqy eńbegi jaryq kórgen edi. «Eńbegim týǵan elime», «Eldiń sózin sóıledim» atty kitaptary oqyrmandarymen qaýyshqan. Endi mine, taza án álemine arnalǵan jańa týyndysy ómirge keldi.
«Mýzyka kitaptarynda ánniń notasy jazylǵan bolsa da, ol kópshilik qaýymǵa túsiniksiz. Sol sebepti ár ánimniń janyna QR-kod engizýdi jón kórdim. Sol arqyly oqyrman qaýym kitapty oqyp qana qoımaı, ondaǵy mýzykalyq shyǵarmalardy telefon arqyly tyńdaı alady. Bul kitap isindegi sıfrlandyrýdyń ozyq nátıjesi dep bilemin», deıdi avtor.
Avtordyń kúı ónerine de qulash urǵanyn baıqadyq. «Sútkent tolǵaýy», «Shardara shalqymasy», «Tolǵaý» dep atalatyn kúıleri berilipti. Sondaı-aq Shyńǵys Bóriuly «Turǵanbek tolǵaýy», Q. Ábish «Turǵanbek» dep atalatyn avtorǵa arnalǵan týyndylaryn qosa engizgen.
Júreginen shyqqan árbir dúnıesine uqyptylyqpen qarap, qaǵazǵa qattap otyrǵan avtordyń eńbekqorlyǵyna, izdenimpazdyǵyna taǵy da tánti boldyq.
Ádil ÁBDIRAMANOV,
Jýrnalıster odaǵynyń múshesi
