Oblys basshysy baspanaly bolǵan azamattardy quttyqtap, óńirde keıingi eki jylda 4 myńǵa jýyq páter tabystalyp, 17 myń turǵynnyń baspana máselesi sheshilgenin atap ótti.
«Bıyl turǵyn úı qurylysyna jáne daıyn páterler satyp alýǵa 34,1 mlrd teńge bólingen. Jyl basynan beri 600-den asa otbasy qonystoıyn toılady. Búgin ózderińizben birge taǵy 50 otbasynyń qýanyshyna jınalyp turmyz. Shańyraqtaryńyz jylýlyq pen meıirimge, balalardyń shat kúlkisine tolsyn», dedi oblys basshysy.
Saltanatty is-sharada qoǵam qaıratkeri, Qyzylorda oblysynyń qurmetti azamaty Bıǵalı Qaıýpov pen Májilis depýtaty Marhabat Jaıymbetov jerlesterin quttyqtap, baspanaly bolǵan Aıgúl Ahmetova qýanyshyn jetkizdi.
Páter kiltin alǵandar arasynda kópbalaly, tolyq emes otbasylar, jetim, ata-ana qamqorlyǵynsyz qalǵan balalar, Aýǵan soǵysynyń ardageri, I-II-top múgedekteri, ózge de áleýmettik top ókilderi bar.
Kilt tabystaý rásiminen keıin óńir basshysy turǵyndarmen kezdesip, aýdannyń áleýmettik-ekonomıkalyq damý múmkindigin talqylady. Bıyl Dúr Ońǵar aýylyna, Josaly kentindegi «Táýelsizdik» shaǵyn aýdanyna gaz jetkiziledi. Kómekbaev, Aqtóbe aýyldarynyń elektr jelileri qaıta jańǵyrtylady, 2 mlrd 958 mln teńgege aýdandaǵy 46,3 shaqyrym kóshe jóndeýden ótken.
«Aýyl – el besigi» baǵdarlamasymen Dúr Ońǵar, III Internasıonal jáne Aqaı aýyldarynda dene shynyqtyrý keshenderi salynyp jatyr.
Qyzylorda oblysy,
Qarmaqshy aýdany
