Jobany ázirleýge óńirde jekelegen qylmystardyń ósip, jalpy tirkelgen qylmystyń 5%-ǵa artqany sebep bolyp otyr eken. Taldaý nátıjesi oblys ortalyǵynda ornalasqan kóńil kóterý oryndarynda jıi qylmys bolatynyn kórsetip otyr. Jyl basynan polısııa organdaryna osyndaı oryndardan 2 700-den asa habarlama túsip, 50 qylmystyq, 1 633 ákimshilik is qozǵalypty.
Qylmystyń barlyǵy 24:00 men tańǵy 5:00 aralyǵynda tirkeletinine nazar aýdarǵan oblys prokýrory Rızabek Ojarov túngi klýb, meıramhana men dámhana jumysynyń kestesin qalyptastyryp, kúzet qyzmetin paıdalaný jáne beınebaqylaýdy ornatýǵa baǵyttalǵan memorandým jasasý máselesin pysyqtaý kerektigin aıtty.
Oblystyq prokýratýranyń qoǵamdyq múddelerdi qorǵaý basqarmasynyń basshysy Baýyrjan Toqmyrzanyń habarlamasynda aýdandardaǵy jergilikti atqarýshy organdar men meıramhana, dámhana ıeleri arasynda jumys kestesin qysqartýǵa jasalǵan kelisim jaqsy nátıje bergeni aıtyldy. Biraq oblys ortalyǵyndaǵy kóńil kóterý oryndarynda jasalǵan qylmys sany azaımaı tur. Olardyń kóbinde demalýǵa barǵan adamnyń qaýipsizdigin qamtamasyz etý sharalary jasalmaǵan. Mysaly, Qyzylordadaǵy «Mak» dámhanasynda ishimdikke toıyp alǵan qala turǵyny esh sebepsiz bir azamatqa pyshaq siltegen. Dál osy dámhanada ashy sýǵa meldekteı toıǵannyń biri demalýshylardyń biriniń uıaly telefonyn tartyp alǵan. Shuǵyla shaǵyn aýdany turǵyndarynyń da aınalasyn ár tún saıyn azan-qazan qylyp jatatyn dámhana ıelerine aıtar shaǵymy kóp.
Oblystyq Qoǵamdyq tamaqtandyrý jáne qyzmet kórsetý salasy qaýymdastyǵynyń jetekshisi Aqmaral Ábdirazaqovanyń dereginshe, oblys ortalyǵynyń ózinde 170-ten astam meıramhana men dámhana bar. Sonyń salyqty ýaqtyly tólep, zań belgilegen talaptardy buljytpaı oryndaıtyn 25-i ǵana qaýymdastyqqa múshe. «Pandemııa kezinde «Ashyk» qosymshasy arqyly qaraǵanymyzda, meıramhana, dámhanalardyń 70%-ynda salyqtyq tirkelim, lısenzııa men SES qyzmeti beretin ruqsat joq bolyp shyqty. Ortaq talapqa baǵynbaı, basqalarǵa kesirin tıgizetin kórinistiń bári – sondaılardyń tirligi. Biraq olardy eshkim «kóre» qoımaıdy. Tekserýshilerdiń zań talaptaryn saqtap otyrǵan meıramhana, dámhanalarǵa shúılige beretini biz úshin túsiniksiz. Jańaǵydaı kóldeneń tabys taýyp jatqandardy kásipker deýge de aýzyń barmaıdy. Osy máseleni aıaqsyz qaldyrmaı, kóldeneń tabys taýyp júrgenderdi bir jaǵyna shyǵarǵan durys», deıdi Aqmaral Maqsutqyzy.
Jergilikti polısııa qyzmetiniń basshysy Erdáýlet Jáýkeev oblys ortalyǵyndaǵy 80-nen astam osyndaı orynnyń 20-ǵa jýyǵy táýlik boıy jumys isteıtinin aıtady. Jaraqty kúzeti turmaq qalqaıǵan qaraýyly da joq kóńil kóterý oryndarynda urlyq-qarlyq ta, buzaqylyq pen aýyr qylmys ta jasalyp jatyr.
«Shyn máninde bular as iship, tynyǵatyn emes, araq iship, jurttyń mazasyn alatyn oryndarǵa aınalyp barady. Biz júrgizgen zertteý toıdan «toımaı» shyqqandardyń osyndaı jerlerge jınalatynyn kórsetip otyr. Demalys pen mereke kúnderi oblystyq polısııa departamenti men qalalyq polısııa basqarmasynyń apparat qyzmetkerlerinen jasaqtalǵan top tańǵa deıin osyndaı dámhanalar mańyn kúzetýge májbúr», deıdi Erdáýlet Baıanbaıuly.
Tıisti oryndar ókilderi qatysqan jıyn qorytyndysynda oblys prokýrory Rızabek Ojarov is-sharalar josparyn bekitip, jergilikti atqarýshy jáne polısııa organdary, «Atameken» kásipkerler palatasy, Ardagerler keńesimen birlesip jumys tobyn quryp, jospardyń oryndalýyn baqylaýǵa alýdy tapsyrdy. Zańdy talaptyń saqtalýyna kedergi jasap otyrǵan «kásipkerlerge» endi tyıym bolatyn shyǵar.
QYZYLORDA
