Túrkistanda ótken dástúrli tamyz keńesinde oblys ákimi Darhan Satybaldy osyndaı derekter keltirdi. Jemqorlyq faktilerine baılanysty óńirde býhgalterlik júıeni ózgertý qolǵa alynǵan. «Biz mektepterdi tekserip shyqtyq. 1 383 artyq shtat jasap, qarjy alyp otyrǵany anyqtaldy. Olardy kezeń-kezeńimen qysqartý jumysy júrip jatyr. Muny qoǵam bolyp birlesip sheshýimiz qajet», dedi oblys ákimi. Jyl basynan beri 7 myńnan asa bala balabaqshada jalǵan tirkelip turǵany belgili bolǵan. Bul boıynsha da tıisti tergeý jumystary júrip jatyr. Sondaı-aq oblys ákimi: «Balany buzýǵa, túzeýge sebep bolatyn bir shart – baldyrǵan kezden bastap kórgen tárbıesi men ónegesi. Táýelsizdigimizdiń tuǵyrly bolyp, elimizdiń bolashaǵynyń jarqyn bolýy bizdiń búgingi adal eńbegimizge baılanysty. Barshańyzdy birlikte kúsh qosyp, bala oqytýdan kesh qalmaýǵa shaqyramyn», dedi. О́ńir basshysynyń aıtýyna qaraǵanda, jemqorlyqqa barǵan jandardan tárkilengen qarajatqa 20 mektep salý qolǵa alynǵan. Onyń 12-si bıyl paıdalanýǵa berilmek. Odan bólek 300-den asa bilim uıymynda jóndeý jumysy júrgizilip, 63 «Jaıly mektep» salý kózdelgen. Onyń 29-yn bıyl paıdalanýǵa berý josparlanyp otyr. Oblystaǵy orta bilim uıymdarynyń jelisi 1060-qa artty. Oqýshylardyń boljamdy kontıngenti – 530 000, onyń ishinde 1-synypqa qabyldanatyn balalar sany – 52 593. О́ńirdiń bilim salasynda 65 762 pedagog qyzmet etedi. Jańa oqý jylynda memlekettik 910 mekteptegi 220 920 oqýshy bir rettik ystyq tamaqpen qamtamasyz etiledi. Túrkistan oblysyndaǵy bilim berý uıymdaryna jańa oqý jyly qarsańynda 62 mektepke 265 arnaıy pán kabıneti alynady. Jańa oqý jylynda 17 081 oqýshy tasymaldanady.
Tamyz keńesinde 10 ustazǵa Oqý-aǵartý mınıstrliginiń «Y.Altynsarın» tósbelgisi tabystalyp, oblys ákiminiń atynan 10 pedagog marapattaldy. Sondaı-aq «Innovasııalyq jobalar» kórmesi uıymdastyryldy. Is-shara barysynda ár aýdandyq bilim bólim basshylary joba jasaýshylardyń jańa jumystaryn qorǵady. Iаǵnı 17 aýdan 17 túrli ınnovasııalyq jobalaryn tanystyrdy. Jobalardyń basym bóligi mektepke deıingi bilim berý uıymdarynyń jumysyn jetildirip, memlekettik qyzmet kórsetýdi sıfrlandyrýdy kózdeıdi. Mamandardyń málimdeýinshe, óńirdegi bilim berý uıymdarynda «E-ashana», «E-Kitaphana», «BilimLand» , «Face ID» syndy avtomattandyrylǵan júıeler qanatqaqty joba retinde tekserýden ótip, oń nátıje bergen. Sonymen qatar «Alaqan» jobasy, «Tolem», «Matatalab» roboty, «IoT board», «Codrone» robottehnıkalyq quraldary kórsetilip, túrli basylymdar men logıkalyq «Intellectum» syndy jańa tehnologııalar usynyldy.
Túrkistan oblysy
