«Bes bótelkege – bir balmuzdaq» dep atalǵan aksııa barysynda eger kimde-kim bes bótelke jınap, arnaıy orynǵa ákelip ótkizse, oǵan syılyqqa bir balmuzdaq berildi.
– Bul is-shara «Taza Qazaqstan» aksııasy aıasynda uıymdastyryldy. Biz shashylyp jatatyn shyny jáne plastık bótelkelerdi, qaýashaqtardy jınaýdyń osyndaı ádisi arqyly kópshilikti ortaq iske tartýdy kózdedik. Eki kúnge sozylǵan aksııa maqsatyna jetti, – deıdi Sátbaev qalalyq ishki saıasat bóliminiń basshysy Amankeldi Quraqbaı.
Eki kún boıy qala ortalyǵyndaǵy alańǵa jan-jaqtan jıǵandaryn ótkizip, táttige qol jetkizýdi maqsat etkenderdiń qarasy kóp boldy. Áleýmet tarapynan atalǵan aksııaǵa negizinen oń pikir bildirildi. Árıne, ara-arasynda «balalar bótelke izdep aýlalardyń arasyn aralap ketti, sonyń keregi bar ma edi?» degendeı pikir de aıtyldy.
– «Tárbıe – tal besikten» degendeı, balalarymyzdy kishkentaıynan eńbekke jáne ózgeniń eńbegin qurmetteýge tárbıeleı bilgenimiz durys. Aksııa barysynda qanshama bala bótelke jınap júrip, soǵan alyp jegen balmuzdaqtyń baldaı tatyǵanyna kúmánim joq. Mundaı is-sharany bastaǵandarǵa da, qostaǵandarǵa da rahmet. Aldaǵy ýaqytta da jalǵasyn taýyp tursa eken, – deıdi qalalyq Aqsaqaldar alqasynyń tóraǵasy О́tesh Ahmetov.
Eki kúnde barlyǵy 51 500 bótelke jınalyp, 10 myńnan asa balmuzdaq taratyldy. Aksııaǵa barlyǵy 2 myńnan asa bala qatysty.
Aksııaǵa qatysýshylardy balmuzdaqpen qamtamasyz etken – «Qazaqmys» korporasııasy. Al jınalǵan bótelkeler jergilikti suryptaý kompanııasyna ótkizildi.
Ulytaý oblysy,
Sátbaev qalasy
