Qazaqsha kıimdegi etno qýyrshaqtar Reseıdiń Kırov qalasynda birshama ýaqyttan beri shyǵarylady. Búginde qamzol men sáýkele kıgen qyz ben shapan, taqııa kıgen ul qýyrshaqtar Reseı dúkenderinde suranysqa ıe. Munyń dáleli, kóptegen dúkennen qazaqy kıim kıgen qýyrshaqtardy kezdestirýge bolady.
– Fabrıkamyzdan bir ǵana qazaq ulttyq kıimindegi qýyrshaqtar emes, ózge ulttardyń kıim úlgisindegi ónimderdi de shyǵaryp otyrmyz. Qazirgi tańda qyzý jumys jalǵasyn taýyp, kıimderdiń túr-túsi men tutynylatyn matalarǵa azdap ózgeris engizdik. «Etno» atty toptamamyzǵa ózge elderdiń mádenı ahýalymen tanysýǵa, olarmen dostyq qarym-qatynasty nyǵaıtýǵa baǵyttalǵan oqytý júıesi bolǵandyqtan, arnaıy balabaqshalardan suranys kóptep túsip otyr. Árıne, balalar úshin qýyrshaqtar arqyly ózge eldiń dástúri men mádenıetine qanyǵý áldeqaıda tıimdirek ekeni daýsyz, – deıdi oıynshyqtar fabrıkasynyń jetekshisi Tatıana Kashına.
Fabrıkadan shyǵatyn arnaıy 400-ge jýyq qýyrshaq túrleri bolsa, olar arqyly 30-ǵa tarta ulttyq kıim úlgileri nasıhattalyp otyr. Jylyna óndiristen mıllıonǵa jýyq ónim shyǵyp, tutynýshylardyń qyzyǵýshylyǵy arta tústi. Onyń ishinde «Elı» men «Marat» atalatyn qazaqsha kıingen qýyrshaqtardyń beınesi jaqynda ǵana túbegeıli jańarýdan ótken.
Qýyrshaqtar fabrıkasynyń bas dırektory Olga Dorotıýk ulttyq qundylyqtardyń mańyzyn atap ótti.
– Qazaqsha qýyrshaqtarǵa qyzyǵýshylyq bildirýshiler úshin jaqynda jańa toptamamyzdyń tusaýkeser rásimin ótkizdik. Olardyń ereksheligi – qazirgi zamanaýı ulttyq kıim úlgilerimen jabdyqtalǵan. Elimizde qazaq, ózbek, Kavkaz halyqtary mol bolǵandyqtan, ónimderimiz orys halqyna jáne balalar arasynda keńinen tanymal, – deıdi ol.
Fabrıkada jańa úlgidegi ónimderdi bezendirýge sýretshiler men arnaıy dızaınerler jumys jasap otyr. Dástúrli qazaqsha kıimdegi qýyrshaqtarǵa suranys óskendikten, búginde zamanaýı úlgidegi ónimderdiń sany artyp keledi.
