Foto: ashyq derekkózden
Qazaq ulttyq óner ýnıversıtetiniń Eýrazııalyq sımfonııalyq orkestri Berlınde ónerlerin kórsetti. Biryńǵaı stýdentterden quralǵan shyǵarmashylyq ujym Germanııada ótken «Young Euro Classic» festıvali aıasynda konsert berip, kóptiń yqylasyna bólendi.
Dombyra shanaǵynan qońyr kúılerimizben qatar Mosarttyń áıgili «Túrik marshy» áýeledi. Segiz jigit erekshe sazdy sımfonııalyq orkestrmen oryndaǵanda áýen árlene tústi. 200 jyldan astam tarıhy bar «Konzerthaus» ǵımaraty klassıka men ulttyq aspaptardyń úndesýinen erekshe kúıge bólengen. Shırek ǵasyrlyq mereıtoıyn toılaǵan mýzyka festıvaline Qazaqstan delegasııasy eki saǵattyq baǵdarlamamen barǵan.
– Biz dombyrada tek kúı ǵana emes, búkil sheteldik shyǵarmalardy da oryndaýǵa bolatynyn kórsetkimiz keledi. Al ekinshi oryndaǵan shyǵarmamyzdy aıtatyn bolsaq, ol – Nurǵısa Tilendıevtiń «Mahambeti». Bul týyndy Qazaq ulttyq orkestriniń ánurany dep esepteımiz. Munymen qazaqtyń baı mýzykasyn shetelge tanystyrýdy murat tuttyq. Qazaqtyń kúıin, fılosofııasyn ártúrli shyǵarmalarymyz arqyly tyńdarmanǵa tanyttyq dep oılaımyn,– deıdi «Shabyt» dombyra ansambliniń múshesi Kenjebek Ádilov.
Mańyzy mol sharada stýdentterimizdiń ónerine nemis tyńdarmandary tánti bolǵandaryn jasyrmady. Orkestr sheteldikterdi tamsandyryp qana qoımaı, olardyń qazaq mýzykasyna degen qyzyǵýshylyǵyn arttyra tústi.
