Foto: ashyq derekkózden
Buǵan deıin qyzmet qylǵan soqyrlar úıine ózi de tap bolamyn-aý degen óńi turmaq, túsine de enbepti. Oıpyr-aı, shapqylap júrip zaǵıp jandarǵa qyzmet qylǵany keshe ǵana edi, endi, mine, óziniń bireýge kúni qarap, qapalanyp otyrǵan jaıy bar.
Zaǵıptar úıine jańadan tap bolǵan buǵan munyń ornyna kelgen azamat tıisti kerek-jaraqtaryn atap, tabystap jatyr.
– Mynaý kıim-keshekterińiz, matasy myqty, Mysyr eliniki, – deıdi.
О́zi alǵan zat, Mysyrdan ádirem qalsyn, kórshi Qytaıdyń kór-jerin biledi... E, ózine de obal joq, múmkin osylardyń kóz jasy urdy ma eken... Alynýǵa tıis zattardy eń arzannan alyp, is-qaǵazǵa qytaıdikin – Mysyrdiki, qyrǵyzdikin Ońtústik Koreıdiki dep... Osy sııaqty etip sapyrylystyryp, aıyrma aqshadan arany ashylyp aryndap-aq edi...
– Etigińiz Italııaniki, – deıdi... It arqasy Italııada nesi bar: «Oý, bul myna turǵan Bishkektiki ǵoı, baǵasy sen aıtyp turǵandaı emes!» dep tepsingisi bar... О́zi alǵan zat, óz qolyn ózi kessin be?
– Án-áýen, habar-oshar tyńdaýǵa qalaı edińiz, mynaý japonnyń magnıtofony, – dep qolyna ustatqan boldy.
Sıpap «kórip» alaqany arqyly kórshi eldiń tanys qondyrǵysy ekenin jazbaı tanydy.
...Qaısybirin aıtsyn, ol ár bergen zatynyń maqtaýyn maıyn tamyza tabystap-aq jatyr. Bul alǵan ár zatynyń qıturqy qyr-syry ózine málim bolǵandyqtan, amalsyz aýyz býýly, qyjyly ishinde, barmaq shaınaǵannan basqaǵa dármen joq...
Ásirese kúni-túni qasynda, ashsa alaqanynda bolatyn taıaǵyn: «Arnaıy Amerıkadan aldyrttyq» degenine de kúıip ketti. Endi qaıtsin, is-qaǵazdy ózi toltyrǵan, ondaǵy ár taıaqtan túsken on myń teńge esinde ǵoı. Bárin aıt ta, birin aıt, soraqysy – osyndaı halge dýshar bolarda operasııa jasaıtyn qural kórshi eldiń kór-jeri ekenin bile tura, ony anaý alystaǵy alpaýyt eldegi apparat qunymen baǵalanyp alǵandary janyna batady... Jańa jyl jylt etkende Qytaıdyń jaryq berip jalt etkish jarylǵysh zatyn osyndaǵy ortada otyryp jaǵyp kórip, jalynǵa oranyp, órti sóndirilip, tike ushqan ushqyn janaryn sharpyp... ile-shala «shala saýatty» kórshiniń apparatynda operasııa jasalynyp... bolatyndy boldyrmaı, bozdatyp ótti emes pe? Búıtken apparatyna bolaıyn, ony alǵandaǵy aıyrmaǵa mingen jeńil kóliginiń enesin uraıyn...
...Buǵan zattaryn tabystap otyrǵan da beker emes, kór-jerdi biletin «kósem» bolýy kerek, ońasha otyrǵandy paıdalanyp, buny ózimsinip jartylyqtyń tyǵynyn ashyp qyrly úremkege quıyp, alyp qoıalyq degeninde:
– Maǵan neǵyp az quıdyń? – dep edi, anaý barlaı qarap: – Qalaı bildińiz? – dep tańyrqaǵanda:
– Menikine quıylǵanda «qulq-qulq» úsh ret, senikine bes ret boldy! – dep, bul mundaǵy alǵashqy bilgishtigin baıqatty...
Berik SADYR
