Sýretterdi túsirgen – Erlan OMAR, «EQ»
Bala kezimizde asyr salǵan Atbasar qalashyǵynyń ajary bul joly alystan menmundalap, kózge ottaı basyldy. О́ıtkeni aýdan ortalyǵynyń kórinisi burynǵydan edáýir kórkeıe túskeni baıqalady. Jańadan salynǵan kópqabatty qaz-qatar tizilgen úıler qalanyń eńsesin kóterip tur. Burynǵy keńestik bákene úıler men surqaı «hrýshevkalar» bolmasa, mundaı jańa záýlim úıler kórinbeıtin. Astyqqa toly keń órisimen, elimizdegi negizgi lokomotıv qurastyrý zaýyttarymen tanylǵan aýdannyń damý qarqynynyń búgingideı kelbeti zańdylyq destik.
Biz áýeli jańa salynyp bitken úılerge baryp, qurylystyń mán-jaıyn bildik. 100 páterli eki úıdi salyp shyqqan qaraǵandylyq («Medina Bilding» JShS) qurylys kompanııasynyń ókili Aıdyn Ámirovtiń aıtýyna qaraǵanda, qurylys mamyr aıynyń sońyn ala bastalyp, úı úsh aıda boı kóteripti. Qazir bári saqadaı saı daıyn tur.
Osy kezde saltanatty jıyn da bastalyp ketti. Sóıtip, bıyl kóktemgi sý tasqynynan zardap shekken Atbasardaǵy 127 otbasyna jańa baspana berildi. Bul – birinshi kezektegi baspanalary múldem jaramsyz bolyp qalǵan turǵyndar. Al buǵan qosa sý basý qaýpi bar aımaqta turǵan 73 otbasyna páter kilti tabystaldy. Osylaısha, Atbasar qalasynda 200 páter qoldanysqa berilip, jurtshylyq qonystoıyn toılady.
Páter kiltterin Aqmola oblysynyń ákimi Marat Ahmetjanov tabys etti.
«Búgin biz úlken jańalyqtyń kýási bolyp turmyz. Birden 200 otbasy jańa páter aldy. Bul – qýanyshty jaǵdaıdyń Konstıtýsııa kúnimen tuspa-tus kelýiniń de máni bar. Ata Zań – halyqtyń jaqsy ómir súrýiniń kepili. Bolashaqta jańa páterlerde tek qýanyshty oqıǵalar bolsyn dep tileımiz», dedi óńir basshysy.
Jańa úıler qalanyń qaýipsiz jerinde salyndy deıdi mamandar. Rasynda, úıler ózennen alys, bıikteý jerge ornalasqany baıqalady. Úılerdiń árqaısysynda santehnıkalyq jabdyqtar men sý jylytqyshtar ornatylǵan. Aýlada balalardyń oıyn alańy jáne vorkaýt alańdary, sport alańy bar.
Baspanaly bolǵandardyń biri – Ydyrys Baılınniń otbasy. Aqsaqaldyń aıtýynsha, bıylǵydaı sý tasqyny buryn-sońdy bolmaǵan.
«Men Atbasarda 35 jyl turyp kelemin, birde-bir ret bulaı sý kirgen joq edi. 2017 jyly sý tek baqshamyzǵa kelse, bıyl úıge kirdi. Sol kezde jergilikti bıliktegiler jańa úı salyp beremiz dep ýáde bergen edi. Sózinde turdy. Úıler berilip jatyr. Jańa úıde balalarymmen, nemerelerimmen birge turamyn. Barlyǵynyń qonysy qutty bolsyn!», dedi zeınetker.
Bıyl elimizdiń biraz jerine jaıylǵan sý tasqyny Atbasar aýdanyn da az shyǵynǵa batyrǵan joq. 375 otbasy sý tasqynynan zardap shegipti. Onyń 130-ǵa jýyǵyna jóndeý júrgizildi deıdi ákimdiktegiler.
«Aýdanda sý basqan 250-ge jýyq úı tolyq tekserilip, saraptama berildi. Zardap shekken turǵyndarǵa 100 aılyq eseptik kórsetkish kóleminde alǵashqy kómek kórsetildi. Komıssııa qorytyndysy boıynsha 40 mln 136 myń teńge shyǵyn kelgeni anyqtaldy, 77 úı apatty jaǵdaıda dep tanylyp, 173 úıge jóndeý jumysy júrgizilmek», deıdi aýdan ákimi Amanbek Qaljanov.
Al qalǵandaryn baspanamen qamtýǵa oblys ákimi taǵy da 145 páterli eki úı bıyl qazan aıyna deıin paıdalanýǵa beriletinin aıtty.
«Zardap shekkenderdi qaýipti jerlerden kóshirý jumystary jalǵasa beredi. Sonymen qatar kelesi jyldarda da mundaı keleńsizdik týyndamas úshin sý arnasyn tazartý, ony tereńdetý, jaǵalardy bıiktetý sekildi jumystar atqarylady. Qazir de Jabaı ózeniniń tabany tazartylyp jatyr. Oǵan memleketten qarajat bólingen», dedi oblys ákimi Marat Ahmetjanov.
Osylaısha, turǵyndardy sý basý aımaǵynan kóshirý máselesi tolyǵymen sheshiledi. Josparly jumys mejeli jerine jetse, 400-ge jýyq úıdi sý basý qaýpi joıylmaq. Sondaı-aq ákim bıyl qyrkúıekte Aqmola óńiriniń tórt aýdanynda, atap aıtsaq, Bulandyda – 115, Jarqaıyńda – 30, Esil aýdanynda – 21, barlyǵy 166 úıdiń qurylysy aıaqtalatynyn jetkizdi.
Aýdanda tasqyn sýdan zardap shekken tek úıler ǵana emes, avtojoldar da qaıtadan kúrdeli jóndeýden ótip jatyr eken. Máselen, bıyl Atbasar aýdanyna jol jóndeýge 13 mlrd teńgeden asa qarjy bólinipti. Qalanyń kireberis joldary, aýdannan Sochı, Qıma aýyldaryna qatynaıtyn joldar jáne Qoshqar ózeni arqyly ótetin Atbasar – Sochı kópiriniń qurylysymen A.Qurmanov kóshesi boıyndaǵy qalalyq joldyń qurylysy bıyl aıaqtalmaq.
Oblys ákimi jıynda sóılegen sózinde jańa úılerdiń mańynda mektep, aýrýhana, balabaqsha salynatynyn da aıtty.
«Ulttyq joba aıasynda Atbasar kópsalaly aýrýhanasy jaqyn mańdaǵy eldi mekenderdi qamtıtyn aýdanaralyq aýrýhana retinde jańarady. Bul tórt aýdandy (Jaqsy, Esil, Jarqaıyń, Sandyqtaý), ıaǵnı 60 myńnan asa adamdy qamtıdy. Jóndeý jumysy jyl sońyna deıin aıaqtalady (smetalyq quny – 1 mlrd teńge, merdiger – «KazEvroStroı» JShS). Aýdan turǵyndary endi medısınalyq qyzmet alý úshin basqa eldi mekenderge barýdyń qajeti joq», dedi ákim.
Jańa páterlerdiń kiltin alǵan atbasarlyqtar el Prezıdentine, eriktilerge, janashyr jandarǵa shynaıy alǵysyn jetkizdi. Sonyń biri kópbalaly ana Juldyz Sádýaqasova aǵynan jarylyp, alǵysyn jaýdyrdy.
«Sáýir aıynda bir túnde úıimiz sý astynda qaldy. Bala-shaǵamyzben shubyryp qaıda bararymyzdy, ne isterimizdi bilmeı sendeldik. Áıteýir bári jańa úı salyp beremiz dep jubatqan edi. Memleket basshysyna, barlyq memlekettik organdarǵa qıyn jaǵdaıda qoldaý kórsetkeni jáne jedel áreket etkeni úshin alǵys aıtamyz. Qazir meniń qýanyshymda shek joq. Endi balalarym jaıly jaǵdaıda ómir súretin boldy», deıdi J.Sádýaqasova.
Osylaısha, kóktemde irgesinen qyzyl sý kirip, berekesi irkitteı irigen jurttyń aspany shaıdaı ashylǵandaı áser qaldyrdy.
