«Nazarbaev zııatkerlik mektepteri» DBBU sońǵy 10 jylda «World Robot Olympiad» halyqaralyq robottehnıka olımpıadasyn turaqty ótkizip keledi. Osy merzim ishinde «NIS» elimizdegi robottehnıka salasynyń damýy men talantty oqýshylardyń halyqaralyq deńgeıdegi komandalyq jarystarda jetistikke jetýine úles qosty. Bıylǵy jarysqa, ásirese, jalpy bilim beretin mektepterden oqýshylar kóp jınalyp, 16 komanda jasaqtalǵanyn erekshe atap ótken abzal. Eki kún boıy «RoboMission», «Future Innovators», «RoboSports» jáne «Future Engineers» sanattarynda baq synaǵan 272 oqýshy óz komandalarymen saıystyń kórkin qyzdyryp, kóp ishinen dara shyǵýǵa tyrysty.
«WRO» baıqaýynyń bıylǵy taqyryby – «Jer-Ana qamqorshylary» dep ataldy. Erejege sáıkes «RoboMission» sanatynda oqýshylar belgili bir mıssııalardy oryndaıtyn robottardy baǵdarlamalap, praktıkalyq tapsyrmalardy sheshýge tyrysty. «RoboSports» sanattarynda baǵdalarlamalaý arqyly sporttyq saıystarǵa derbes túrde qatysa alatyn robottar, al «Future Engineers» sanatynda robottehnıka jáne ınjenerııa negizderin qoldana otyryp, kúrdeli tehnıkalyq tapsyrmalarǵa arnalǵan ınjenerlik sheshimder qurastyrylady. «Future Innovators» sanatyndaǵy ónertapqyshtar adamdardyń tabıǵatpen úılesimdi ómir súrýine kómektesetin, joıqyn tabıǵı qubylystardan qorǵaı alatyn, klımaty qatal aýmaqtarda turýǵa jaǵdaı jasaı alatyn robot modelderin ázirledi.
Olımpıadanyń ashylý saltanatynda «Nazarbaev zııatkerlik mektepteri» DBBU basqarma tóraǵasy Ánýar Janǵozın jas robottehnıkterdiń aldynda mańyzdy kezeń turǵanyn atap ótti. Ári qatysýshylarǵa úlken senim arta otyryp, bıylǵy jylǵy taqyryptyń ózektiligine toqtaldy.
– Qorshaǵan ortany qorǵaý, tabıǵatqa janashyrlyq tanytý – árqaısymyzdyń mindetimiz. Ekologııalyq máseleler jyl ótken saıyn kúrdelenip, olardy sheshýde jańa tehnologııalar men ınnovasııalyq tásilderdiń qajettiligi artyp keledi. Sondyqtan bıylǵy jarysta usynylatyn jobalar tabıǵat pen adamzattyń úılesimdi ómir súrýine úles qosatynyna senim bildiremin. Bul mindetterdi sheshý talantty jastardyń qolynda, – dedi ol.
«Future Innovators» shyǵarmashylyq sanaty boıynsha tóreshilerge 50 joba usynyldy. Jas robottehnıkterdiń sý tasqyny, jer silkinisi, jahandyq jylyný, ekologııa, aýyzsý tapshylyǵy, basqa da ǵalamdyq máselelerge alańdap, onyń sheshimin tabýǵa, kúrdeli máselelerdi jeńildetýge arnalǵan robottar qurastyrýǵa degen yntasy erekshe nazar aýdartty. Osy rette Astanadaǵy Nazarbaev zııatkerlik mektebiniń oqýshylary Taır Tursynhan men Qalıaqpar Baımuhan ázirlegen robot sý tasqyny kezinde adamdarǵa kómekshi bola alady.
– Búgingi kúni planetamyzdyń temperatýrasy bir gradýsqa kóterilip, ǵalamdyq jylyný úrdisi jalǵasyp jatyr. Saldarynan mıllıondaǵan tekshe metr sý býlanyp, jaýyn-shashynnyń kóbeıip, sý tasqynynyń qaýpin kúsheıtip otyr. Bıylǵy kóktemde osyndaı tasqyndardyń kýási boldyq. Sondyqtan adamdarǵa qaýipti aımaqtan jyldam shyǵýǵa, qaýipsiz jerge jetýge kómektesetin qutqarýshy robot jasaýdy qolǵa aldyq, – deıdi Taır.
Al Jambyl oblysy Baızaq aýdanynyń N. Kıikbaev atyndaǵy aýyldyq mektep-gımnazııasynan qatysqan Beksultan Aıdar men Jansultan Oshaqbaıdyń aýyl sharýashylyǵyna arnalǵan «Ekoaýyl» jobasy qashyqta ornalasqan aýyldyq aımaqtardaǵy jumysty avtomattandyrý jáne kún, jel, sý sııaqty jańartylatyn energııa kózderin paıdalanýdy kózdeıdi.
Olımpıadanyń nátıjesi boıynsha «RoboMission Elementary», «RoboMission Junior» jáne «RoboMission», «Senior» sanattarynda Astanadaǵy Robotek mektebinen kelgen Gleb Lıstopadnıı men Ádilhan Mýkýshev, Amandos Áýbákir men Ákejan Jetpisbaev, Ańsar Saýrbaev pen Marat Kazkenov jeńimpaz atandy. Al oraldyq ónertapqyshtar Nurdáýlet Hamza men Arýjan Kýrmatova, «Future Engineers» sanatynda Qyzylordadaǵy Nazarbaev zııatkerlik mektebiniń oqýshylary Ernur Sádý men Aldııar Appaz «RoboSports» sanatynda jeńis tuǵyrynan kórindi.
Taldyqorǵandaǵy Nazarbaev zııatkerlik mektebiniń órenderi Alınur Rınatuly men Nuralı Nurjan «Future Innovators. Elementary» sanatynda, Serjan Qaldybek pen Aqnıet Moldakerımov «Future Innovators. Junior» sanatynda, Ińkár Qurmanbaeva men Aıym Baýyrjanqyzy «Future Innovators. Senior» sanatynda birinshi oryndy ıelendi.
Respýblıkalyq chempıonatta úzdik nátıje kórsetken komandalar bıyl qarasha aıynda Túrkııada ótetin «WRO-2024» olımpıadasynyń álemdik kezeńinde el namysyn qorǵaıdy.
ALMATY
