Rasynda solaı, memlekettiń irgesi berik bolmaǵy jumysshy mamandarǵa da baılanysty. Ásirese ǵylym-bilim damyp, zaman ilgerilegen saıyn jumysshy mamandarǵa suranys arta beredi. Bul órkenıetke bet burǵan qoǵamnyń ǵana emes, ekonomıkanyń zańdylyǵy dep túsinemiz. Biz kásipodaqta júrip, eńbek adamyn qadirleý, onyń eńbegin baǵalaý, syı-qurmet kórsetý degendi jumysshynyń ádildikke qol jetkizip, eńbeginiń laıyqty baǵalanýy dep túsindik. Eńbek adamyna keregi sol, mańdaı termen tapqan tabysy ózine, otbasyna jetse deıdi. Sondyqtan jumysshy mamandardyń jylynda bul máselege árbir jumys berýshi ǵana emes, qoǵam bolyp mán berýimiz kerek.
Prezıdent Joldaýda kásiptik bilim salasyndaǵy reforma arqyly ekonomıkanyń ósimin qamtamasyz etýge bolatynyn aıtty. Iаǵnı keler jyly tehnıkalyq jáne kásibı bilim júıesi reformalanatyn boldy.
«Adal ári tabandy eńbegimen tabysqa jetken adamdar qashanda qurmetti, syıly bolýy kerek. Bul biz usynyp otyrǵan «Adal azamat – Adal eńbek – Adal tabys» qaǵıdatyna tolyq saı keledi. Bir sózben aıtqanda, bizdiń qoǵamda eńbekqorlyq, kásibılik sııaqty qasıetter óte joǵary baǵalanýǵa tıis. О́z kásibin jetik meńgergen mamandar ult sapasyn arttyrady. Sondyqtan eńbek adamynyń mártebesin kóterip jatyrmyz. Bul baǵyttaǵy jumys toqtamaıdy, jalǵasa beredi. Jumystyń jamany joq, kez kelgen eńbek – qadirli. Eń bastysy, árkim jaýapkershilikti tereń sezinip, óz mindetin sapaly atqarýǵa tıis. Sonda ǵana elimiz damýdyń sara jolyna túsedi. Halqymyzda «Jumystyń kózin tapqan baılyqtyń ózin tabady» degen sóz bar. Kásibine adal ári jaýapkershilikpen qaraǵan adam qashanda laıyqty baǵasyn alady. Bul túsinikti qoǵam sanasyna sińirý qajet. Azamattarǵa qurmetti ataq berýdegi túpki maqsatymyz da osy. Buǵan deıin muǵalimderge, dárigerlerge jáne mádenıet qaıratkerlerine osyndaı ataqtar berile bastady. Bul – óte jaqsy bastama, onyń aıasyn keńeıtý kerek», dedi Prezıdent Joldaýda.
Qoǵamda bilikti mamannyń bási joǵary. О́z kásibin jetik biletin mamannyń ózi bir orynda turalap qalmaı, «bilsem», «izdensem», «kórsem» deıdi. «Eńbek adamynyń mártebesin kóterý» degen tamasha bastama qur jelge ushqan sóz bolyp qalmaýǵa tıis. Iá, kúndelikti qym-qýyt tirshilikte jumysyna atústi qarap, júrdim-bardym is tyndyratyndar da kezdesedi. Ońaı oljaǵa kenelgisi keletinderdiń baryn joqqa shyǵara almaımyz. Ońaı tabys tabamyn dep ot basqandar bar. Jastardy bylaı qoıǵanda, keıbir aqyl toqtatqan eresekterdiń ózi «jeńildiń astymen, aýyrdyń ústimen» júrýdi qolaı kórip jatady. Al túptiń túbinde adal eńbegimen, mańdaı termen tabys tapqandar tórge shyǵady. Kásibine adal jumysshy qoǵamǵa, ujymǵa syıly. Qazirgi zań ústemdik qurǵan quqyqtyq qoǵamda árbir azamat osyny kókeıge túıse, ómirlik qaǵıda retinde ustansa dep oılaımyz.
Taǵy bir jaǵymdy habardy aıtsaq, ınjener-geologterge, ken ornyn ıgerýshi mamandarǵa, aýyl sharýashylyǵy, kólik jáne sý salasynyń qyzmetkerlerine, ǵalymdar men ónertapqyshtarǵa beriletin qurmetti ataqtar memlekettik marapattar sanatyna qosylatyn bolypty. Munyń ózi tańdaǵan mamandyǵymen jyldar boıy taban aýdarmaı eńbek etip kele jatqan sala úzdikterin shabyttandyrady. Erteń sol marapatty alǵan azamattardy jastarmen júzdestirip, kezdesýler uıymdastyryp jatsa, nur ústine nur emes pe? Jastar eńbek adamdaryna qarap boı túzese, eliktese, eńbegin baǵalasa, odan esh utylmaımyz.
Eńbek adamdarynyń jaıy kún tártibine shyǵyp jatqanda «ár jumysshynyń, muǵalim, dáriger, ormanshy, taǵysyn taǵy mamandardyń jumysy qaı kezde qadirli bolady?» degen suraqqa alańdaımyz. Bizdińshe, kez kelgen jumysshynyń eńbegi ádildik taýyp jatsa qadirli. Ol úshin bizge eńbek zańnamasyn taǵy bir muqııat qarap, jumys berýshi men jumysshy arasyndaǵy mindetter men quqyqtardy qaıta retteý qajet.
Nurlan О́teshov,
Kásipodaqtar federasııasy tóraǵasynyń orynbasary
