Qasym-Jomart Toqaevtyń keshegi sózi eldiń kókeıindegini dóp basty dep senimmen aıta alamyz. Nege? Jurtshylyq ekonomıkanyń naqty sektoryna kredıt bólýdiń tómen deńgeıde turǵanyn, sodan baryp iskerlik belsendiliktiń beleń almaı kele jatqanyn aıtatyn. Prezıdent salyq saıasatyn qaıta qaraý, ony da ádilettilikke beıimdeý kerek ekenin eskertti. Bıýdjet shyǵynyn shekteý qajettigi de sóz etildi. Prezıdent kórpege qarap kósilmeske bolmaıtynyn, shashpalyqtyń shalaǵaılyqpen shendesetinin atap kórsetti. Memleket basshysy Eýrazııanyń qaq ortasyndaǵy Qazaqstannyń kólik ınfraqurylymyn artyqshylyqqa aınaldyrýǵa ábden bolatynyn naqty nusqady.
Eldiń eleńdeı jaýap kútken taǵy bir taqyryby – atom energetıkasyn damytýdyń jaıy edi. Ol da aıtyldy. Toqaev bul máseleniń sý resýrstary shekteýli Qazaqstan úshin strategııalyq másele ekenin eske salyp ótti. Taǵdyrsheshti sharýanyń sheshýin eldiń ózine qaldyrdy ári bul másele boıynsha referendým ótetin kúndi belgilep berdi. Infraqurylymdyq jobalardyń eń bir tolǵaǵy jetkenderine, ásirese energetıka sektoryndaǵy uzaqmerzimdi tarıf saıasatyn qalyptastyrýdyń jaıyna toqtala kelip, jahandyq energııa tapshylyǵy jaǵdaıynda qýattyń senimdi kózderine, ásirese atom energetıkasyna kóńil bólýdiń mańyzdylyǵyn qadap aıtty. О́z tarapymyzdan álemdegi ýran qorynyń shırek bóligi (shırek bóligi Ońtústik Afrıka Respýblıkasynda, qalǵan jartysy basqa elderde) shógip jatqan Qazaqstandaı elde Jaratqannyń bul syılyǵynan bas tartýdyń kókeıge qonymsyzdyǵyn, endigi bar másele bolashaq jobanyń oıdaǵydaı júzege asýynda, bul taza ekonomıkalyq problemanyń saıasılanýyna jol bermeýde ekenin qosa aıta keter edik.
2025 jyldy Jumysshy mamandyqtary jyly dep jarııalaý jónindegi sheshim de kóptiń kóńilinen shyǵary sózsiz. Bul arqyly jumys adamynyń, kásip ıesiniń abyroıyn kóteremiz, eńbektiń qadir-qasıetin arttyramyz. О́mirdi ózgertetin – tek eńbek. Eńbek bar qıyndyqty jeńbek. Bar ıgilik tek eńbekpen kelmek.
Joldaýdan ózimiz izdegen talaı suraqqa jaýap taptyq, bul qujat alǵa qoıǵan tyń talaptar oıdaǵydaı oryndalǵan jaǵdaıda ómirimizdiń jańa órisin asha alady deıtinimiz de sondyqtan.
Saýytbek ABDRAHMANOV,
Memlekettik syılyqtyń laýreaty
