Páterler qalanyń kommýnaldyq turǵyn úı qorynan baspana satyp alý baǵdarlamasy aıasynda tabystaldy. Jaryq ta jaıly páterler «KazSMU» JShS-nyń 360 páterli kesheninen satyp alyndy.
«Prezıdent Qasym-Jomart Toqaev turǵyn úımen qamtamasyz etý memlekettik áleýmettik saıasattaǵy basymdyq ekenin, bul másele jiti nazarynda bolatynyn aıtty. Osy baǵytta Almaty oblysynda da belsendi jumys júrgizilip jatyr. Bıyl áleýmettik osal toptarǵa arnalǵan 1 304 páterdi satyp alý josparlanǵan. Onyń 55-i búginde satyp alyndy. Oblys ortalyǵynda qosymsha 145 páter satyp alynyp, áleýmettik osal topqa jatatyn azamattarǵa beriledi. Jalpy, oblys boıynsha 61 kóppáterli turǵyn úı (1 618 páter) qurylysy júrgizilip jatyr. Jyl sońyna deıin 3 myńǵa jýyq oblys turǵyny jańa baspanaǵa ıe bolady dep kútilip otyr», dedi Marat Eleýsizuly.
Jańa páterge ıe bolǵandardyń biri – Anar Almuratova. Kúmis alqa ıegeri bes qyz, bir ul tárbıelep otyr. Ol on jyldan beri Qonaev qalalyq aýrýhanasynda medbıke bolyp jumys isteıdi.
«Qonaevta turyp jatqanymyzǵa on jyl boldy. 2012 jyly kóship keldim. Konstıtýsııa kúni qarsańynda úı berip jatyr, balapandarymyz osy jerden sabaqqa barady. Eki bólmeli úı, 78 sharshy metr, ishi úlken», dedi qýanyshtan júzi bal-bul janǵan A.Almuratova.
«Sun City» turǵyn úı kesheni qalanyń jaıly ári qolaıly bóliginde ornalasqan. Ǵımarattyń qurylysy eki jyl buryn bastalyp, bıyl paıdalanýǵa berildi. 12 qabatty nysannyń aýlasy tolyq abattandyrylǵan. Balalarǵa arnalǵan sporttyq, oıyn-saýyq alańdary da ornatylypty.
«Qonaev qalasynda baspana kezeginde 1 834 adam tur. Olardyń arasynda kópbalaly analar, jetim balalar jáne múgedektigi bar adamdar bar. Jyl sońyna deıin 165 páterdi Úkimet tarapynan berý josparlanyp otyr», dedi Qonaev qalasynyń ákimi Ashat Berdihanov.
Konstıtýsııa kúni Almaty oblysynda keńinen atalyp ótti. Ata zańymyz ardaqtalǵan mereıli mereke aıasynda barlyǵy 45 myńnan asa adamnyń qatysýymen 230 is-shara uıymdastyryldy. О́ńirdiń ár túkpirinde osy ataýly kúnge arnalǵan saltanatty jıyn, merekelik konsert, kórme, fleshmob, mádenı is-shara, sporttyq jarys ótti. Sonymen qatar taqyryptyq kezdesýler men konferensııa uıymdastyryldy. Onda konstıtýsııalyq normalardy iske asyrýǵa baılanysty jetistik talqylandy. Bul is-sharalarda jastar erekshe belsendilik tanytty.
Konstıtýsııa kúnin merekeleý aıasynda oblys ortalyǵynda «Ata zańym – aıbynym!» atty merekelik jıyn ótip, onda oblys ákimi M.Sultanǵazıev óńir jurtshylyǵyna jyly lebizin joldady. Saltanatty is-sharada qoǵamdyq uıymdar men shyǵarmashylyq ujymdardyń ókilderi sóz sóılep, Konstıtýsııanyń memleketimizdiń negizi retindegi mańyzyn atap ótti, onyń qaǵıdattary negizinde eldiń odan ári damýyna senim bildirdi. Merekelik is-shara barysynda óńirdiń túrli salasy men qoǵamdyq ómiriniń damýyna eleýli úles qosqan azamattar marapattalyp, birqataryna memlekettik nagradalar tabys etildi. Olardyń ishinde belgili akter Bekjan Turys ta bar. О́ner maıtalmanyna «Almaty oblysynyń qurmetti azamaty» ataǵy berildi.
Almaty oblysy
