Sýretti túsirgen – Valerıı Býgaev
Zelenaıa rosha aýylyndaǵy mekteptiń negizi 1964 jyly qalanǵan. Biraq nysan ábden eskirgenine baılanysty 2018 jyly jergilikti bıýdjet esebinen jalpy aýmaǵy 1020 sharshy metr bolatyn jańa ǵımarat turǵyzylǵan. Peshpen jylytylatyn eski júıeniń ornyna modýldik qazandyq ornatyldy. Sol kezde «Tabys» ShQ qoldaýymen sport zaly da salynǵan bolatyn. Endi bıyl kásipker Manat Alǵambarov mektepke kezekti syılyǵyn jasady. Onyń jeke qarajatyna aýmaǵy 143 sharshy metr qosymsha ǵımarat turǵyzyldy. Onda bastaýysh synyp balalary oqıdy dep kútilip otyr.
Osy ýaqytqa deıin oryn jetispeýshiligine baılanysty mekteptiń bastaýysh synyptary eki aýysymda oqyp kelgen. Endi bastaýyshtaǵy 19 bala oqýyn jańadan salynǵan keń ári jaryq kabınetterde bastaıdy. Al joǵary synyptar 2018 jyly turǵyzylǵan mektep ǵımaratynda oqýyn jalǵastyrady.
Pavlodar oblysynyń ákimi Asaıyn Baıhanov kásipkerdiń tartýy maqtaýǵa laıyq bastama ekenin atap ótti.
– Týǵan aýylyna, onyń turǵyndaryna, keleshegine jaýapkershilikpen qarap, óskeleń urpaqtyń bolashaǵyna oı júgirtip otyrǵan kásipker azamattyń isi qurmetke ábden laıyq. Týǵan óńiriniń taǵdyryna beıjaı qaramaı, kómek qolyn sozǵan barlyq mesenat pen demeýshige alǵysymdy bildiremin. Biz óz tarapymyzdan azamattarymyzdyń ál-aýqatyn jáne oblystyń órkendeýin arttyrý úshin bar kúshimizdi salamyz, – dedi óńir basshysy.
Jańa ǵımaratpen tanysqan Asaıyn Baıhanov robottehnıka kabınetiniń jabdyqtary men sport quraldaryn satyp alý úshin Zeleneıa rosha mektebine 30 mln teńgeniń sertıfıkatyn tabystady.
Jalpy, qazirgi ýaqytta Ertis – Baıan óńirindegi mektepterde 6 myńnan astam oryn tapshylyǵy bar. Jańa oqý jylynda 7 mektep oqýshylary úsh aýysymda oqıtyn bolady. Mektepterdegi oryn tapshylyǵy máselesin «Jaıly mektep» ulttyq jobasy aıasynda sheshý kózdelgen.
Máselen, oblys ortalyǵyndaǵy «Dostyq» shaǵyn aýdanynyń oqýshylary bıylǵy qarasha aıynan bastap jańa mektepte oqıdy. Aýmaqta «Jaıly mektep» ulttyq jobasy aıasynda 1 200 balaǵa arnalǵan zamanǵa saı bilim uıasy paıdalanýǵa beriledi. Búginde qurylys jumystary aıaqtalý sheginde. О́ńirlik bilim berý basqarmasynyń málimetinshe, jańa ǵımarat qalanyń atalǵan bóligindegi oryn tapshylyǵyn sheshedi. Al mektep zamanǵa saı oqý jabdyqtarymen qamtylady. Al jalpy Pavlodar oblysynda barlyǵy bes jaıly mektep salynady degen jospar bar.
Pavlodar oblysy,
Ekibastuz qalasy,
Zelenaıa rosha aýyly
