Foto: Ulttyq sport qaýymdastyǵy
«Amanat» partııasynyń hatshysy Erjan Jylqybaev Halyqaralyq «Uly dala joryǵynyń» ashylý salatanatynda sóz alyp, QR Parlamenti Májilisiniń Tóraǵasy, «Amanat» partııasynyń Tóraǵasy Erlan Qoshanovtyń quttyqtaý hatyn oqyp berdi.
«Uly dala tósinde ótetin kóshpendilerdiń ulan-asyr merekesiniń basy – osy «Uly dala joryǵy» marafon-báıgesinen bastalady», delingen hatta.
Bul joryqqa Ońtústik Afrıka, Iran, Túrkııa, Qyrǵyzstan, Qarashaı-Sherkesh, Qabardın-Balqar, Tatarstan, Majarstan elinen kelgen komandalar qatysyp jatyr.
El namysyn Mańǵystaý oblysynyń qos komandasy, Jetisý oblysy, Almaty qalasy, Jambyl, Aqmola, Qostanaı, Shyǵys Qazaqstan, Aqtóbe oblysynyń komandalary qorǵaıdy.
Tuńǵysh ret ótip jatqan joryqqa elimizden qos birdeı qyzdar komandasy qatysyp jatyr. Biri Mańǵystaýdan kelgen «Sýyn» komandasy bolsa, ekinshisi Aqmola oblysynyń «Tomırıs» komandasy. Aqmolanyń arýlary buǵan deıin respýblıkalyq marafon-báıgege qatysqan, tájirıbe jınaǵan.
Halyqaralyq «Uly dala joryǵyn» uıymdastyrýshylar bul joly qazaqy tuqymdarǵa erekshe mán berdi. Sol sebepten Adaı, Naıman, Kóshim, Áýlıe ata, Qostanaı, Jetisý arǵymaǵy tuqymdary osy jarysqa qatysyp jatyr.
Saltanatty is-sharada sóz sóılegen Ulttyq sport qaýymdastyǵynyń prezıdenti Islambek Saljanov, bul joryq órkenıettiń tal besigi Botaıdan bastalǵanyna erekshe toqtaldy.
«Sebebi Botaı eń alǵash jylqy qolǵa úıretilgen jer. Sol sebepti tarıhı mekenniń mańyzy osyndaǵy barsha qatysýshyǵa qundy dep esepteımin», dedi ol.
Halyqaralyq «Uly dala joryǵy» marafon-báıgesi Astanada ótetin 5-shi Dúnıejúzilik kóshpeliler oıyndarynyń bastaýy boldy.
Eske sala keteıik, Respýblıkalyq «JORYQ» at sporty federasııasy Qazaqstan Respýblıkasy Ulttyq sport qaýymdastyǵynyń quramyna kiredi. Qaýymdastyq quramynda budan ózge «Kókpar», «Báıge», «Sadaq atý», «Teńge ilý», «Aýdaryspaq», «Jamby atý», «Qusbegilik», «Asyq atý» jáne t.b. federasııalar bar. QR Ulttyq sport qaýymdastyǵyn Islambek Saljanov basqarady.
Atap óteıik, 8-13 qyrkúıekte Astana qalasynda 5-shi Dúnıejúzilik kóshpeliler oıyndary ótedi. Is-sharaǵa 89 elden 2000-nan astam sportshy qatysady dep josparlanyp otyr. Astanada ótetin Dúnıejúzilik kóshpeliler oıyndarynda barlyǵy 21 sport túrinen 97 medal jıyntyǵy sarapqa salynady.
