Foto: gov.kz
Aýyl sharýashylyǵy jerlerin bólýdiń barlyq prosedýrasy sıfrlandyrylǵan atalǵan jobany ádildik pen ashyqtyqty qamtamasyz etý maqsatynda oblys prokýratýrasy men oblystyq jer qatynastary basqarmasy birlesip qolǵa alǵan.
Joba respýblıkada alǵash ret pılottyq rejımde aldaǵy qarasha aıynda Sarqan aýdanynda júzege asyrylady dep josparlanyp otyr. Ol óz tıimdiligin kórsetse, kelesi jyldan bastap barlyq el aýmaǵynda iske qosylady.
«Jergilikti jerde keminde 5 jyl turǵan azamattar men kásibin bastaǵanyna úsh jyldan aspaǵan kásipkerlerge artyqshylyq beriledi. Oǵan qosa egistik jerler úshin tehnıkalarynyń qýattylyǵy, jaıylym jerler úshin mal basynyń sany, sonyń ishinde tehnıka men maldyń keminde on eki aı buryn tirkelgendigi esepke alynady. Tipti sharýashylyqtaǵy qyzmetkerler sany, olardyń zeınetaqy men salyq aýdarymdarynyń bolýy da eskeriledi. Osynyń bárine belgili deńgeıde ball beriledi. Bul túptep kelgende aýyl sharýashylyǵyn tıimdi damytýǵa baǵyttalyp otyr», deıdi oblystyq jer qatynastary basqarmasynyń basshysy Ermek Ápekov.
Basqarma basshysynyń aıtýynsha, elektrondy konkýrstyń ótkizilý prosesine jergilikti atqarýshy organnyń qyzmetkerleri qatyspaıdy. Jáne onda burynǵydaı ınvestısııa kólemi eskerilmeıdi. Oǵan qosa iri jer kóleminiń bir qolda shoǵyrlanýyna da jol bermeý qarastyrylǵan. Sondaı-aq konkýrsqa qatysýshylar túrli anyqtamalar men qujattar jınap áýrelenbeıdi, sebebi sıfrlyq júıe Aýyl sharýashylyǵy, Ádilet, Qarjy, Eńbek jáne halyqty áleýmettik qorǵaý mınıstrlikteriniń derekter bazasymen ıntegrasııalanǵan.
Atalǵan oblysta osy jyldyń basynan beri jer bólýge qatysty 28 konkýrs ótkizildi, oǵan 659 adam qatysyp, 84 myń gektardan astam jer bólinip berilgen.
