Foto: Astana ákimdigi
2024 jyldyń basty sporttyq dodasy sanalatyn Parıj Paralımpıadasynda nysana kózdeýden qos otandasymyz júldege talasyp, Erkin Ǵabbasov tarıhı kúmis medaldy ıelense, áıelder básekesinde astanalyq arý Sevda Álıeva 13-orynǵa turaqtady.
Osy oraıda nysana kózdeýden el sportshylary tek 2021 jylǵy Tokıo Paralımpıadasynan bastap qana qatysyp jatqanyn aıta ketý kerek.
«Nysana kózdeýden nebári úshinshi halyqaralyq jarysym. Sondyqtan Parıj Paralımpıadasyna qatysýdyń ózi úlken tájirıbe. Iri dodalar arqyly qateligińdi kórip, nemen jumys isteý kerektigińdi ańǵarasyń. Endi kelesi Paralımpıadada júldemen oralýǵa tıispin. Elimizdiń kók týyn ashylý saltanatynda ustap shyǵý baqyty buıyrdy. Tek qana Qazaqstan ǵana emes, búkil álem kóz tikken Parıj Paralımpıadasynyń atmosferasyn sózben aıtyp, jetkizý múmkin emes. Buǵan deıin ózderińiz biletindeı, 2023 jyly bı sportyndaǵy eń bıik jetistik – álem chempıony atandym. Kópshiliktiń aldynda ózin-ózi ustaý, qysylmaý sekildi mańyzdy qasıetter nysana kózdeýde de óz paıdasyn tıgizdi dep oılaımyn. Endi maqsattarymyz joǵarlaı bermek», dedi Sevda Álıeva.
Sondaı-aq erler arasynda kúmis júldeger atanǵan Erkin Ǵabbasov ta óz oıyn bólisti.
«Daıyndyq Almaty qalasynda ótti. Árıne, birinshi ret kúmis medal alý – joǵary jetistik. Chempıon atanǵan, rekordty jańartýshy Jın Ho Parkqa (Ońtústik Koreıa) sál ǵana jetpeı qaldym. Bul sportshy 2016 jyldan beri turaqty túrde qatysyp, júlde de alyp úlgergen. Tájirıbesi tolysqan, qaı kezde qandaı taktıkany qoldanýdy biledi. Osymen bıylǵa arnalǵan sporttyq kúntizbe aıaqtaldy. Endi sál tynyǵyp, qaıta jattyǵýǵa kirisetin bolamyz», dedi sportshy.
Aıta keteıik, Parıj Paralımpıadasyna Qazaqstan atynan 44 sportshy 9 sport túrinen júldege talasyp jatyr.
