Memleket basshysynyń tapsyrmalaryn oryndaý maqsatynda iske asyrylyp jatqan bul joba azamattardyń tabysyn arttyrýǵa septesýdi, keshendi kómek kórsetýdi kózdeıdi. Jobanyń bastamashylary – Astana qalasynyń ákimdigi men «Jańa múmkindik» qoǵamdyq qory.
Osydan týra bir jyl buryn turǵyndar kóp jınalatyn jerlerde «Barshaǵa múmkindik» modýldik pýnktteri ashyla bastady. Bul oryndardyń maqsaty – esepke alynbaǵan jumyssyzdyqty anyqtaý ári memlekettik qoldaý sharalary, jumysqa ornalasý múmkindikteri, qysqamerzimdi oqytý jóninde tıimdi keńes berý. Qajet bolǵan jaǵdaıda turǵyndarǵa ESQ qaıta shyǵarý, turǵyn úıge kezekke turý, AÁK alý, kezekte.kz, enbek.kz, indigo.kz, basqa da resýrstarǵa tirkeý usynylady. Osylaısha, bir jyl ishinde senimi bekigen 20 myńnan asa elordalyq jobaǵa qatysty. 4,5 myńnan asa turǵyn modýldik pýnktter arqyly ákimdik basqarmalaryna memlekettik qoldaý sharalary aıasynda bıznes ashý, úı alý, jumysqa ornalasý, balalarǵa bilim berý jáne bos ýaqytty tıimdi paıdalaný máseleleri boıynsha ótinimder joldady.
«Joltap» jobasynyń ekinshi kezeńinde 15 jumysshy mamandyǵy men sıfrlyq daǵdylar boıynsha praktıkaǵa arnalǵan oqý synyptary men sehtar iske qosylyp jatyr. Atap aıtsaq, barısta, satýshy-kassır, tiginshi, modeler-konstrýktor, býhgalterlik esep negizderi, aıaqkıim jóndeý, elektr-gaz mamany, korpýstyq jıhaz jasaýshy sııaqty mamandyqtarǵa jáne saıt ázirleýshi, mobılograf, targetolog, vıdeomontaj, grafıkalyq dızaıner, SMM mamany degendeı sıfrlyq daǵdylarǵa baýlý qolǵa alyndy.
Jobanyń aralyq qorytyndysyn shyǵarý jónindegi kezdesýde Astana ákimi Jeńis Qasymbek mamandyqtar tizimi qalanyń ekonomıkalyq ereksheligin eskere otyryp, saýda, servıs, frılans jáne óndiris salalary boıynsha jasalǵanyn atap ótti.
«О́mir sapasy kóp jaǵdaıda alǵan kásibi men jumysyna baılanysty. О́kinishtisi, turǵyndardyń bári birdeı bir kásiptiń qulaǵynan ustaı alǵan joq. Bizdiń mindetimiz – qazirgi naryqta qajetti daǵdylardy meńgerýge, jumysqa ornalasýǵa kómektesý. Memleket adamdardy qoldaý jáne jumysqa ornalastyrý boıynsha túrli áleýmettik baǵdarlamany iske asyryp jatyr. О́tken jyly qalada «Joltap» áleýmettik jobasyn iske qostyq. Bul baǵdarlamanyń aıyrmashylyǵy – adamdarǵa jańa mamandyq boıynsha bilim alýǵa múmkindik beriledi. Kórsetkishke qarasaq, jobanyń sátti júzege asyp jatqanyn baıqaımyz», dedi ákim.
Jobanyń kelesi kezeńi – jumys berýshilermen tikeleı jumys isteý, «Jumystap.kz» servıstik platformasyn iske qosý. Bul jobamen «Magnum», «Sportmaster», «GLB», «Danmard» tigin fabrıkasy, «Iýtarııa», «YDA» zaýyty jáne basqa da qalanyń jelilik ári iri jumys berýshileri qamtyldy.
Búginde «Jumystap» platformasy jumys istep tur. Munda qarapaıym ınterfeıstiń kómegimen úmitkerlerge qoıylatyn talaptardy egjeı-tegjeı sıpattaýǵa bolady. Bıznes ókilderi men jeke tulǵalar turaqty jumys ornyna qyzmetkerdi ǵana emes, sonymen qatar kólemdi tapsyrystardy oryndaýshylardy da taba alady.
Elimizdiń basqa aımaqtarynyń turǵyndary da atalǵan jobanyń ıgiligin sezingisi keledi. Bul Úkimettiń de nazaryna ilinip, jobanyń aýqymyn 4 aımaqqa – Almaty, Shymkent, Aqtóbe, Qaraǵandy qalalaryna keńeıtý týraly sheshim qabyldandy.
