Aýyldyqtar daýys berdi

Aýdandaǵy Birlik, Teńdik aýyldary jýyrda bolǵan sý tasqynynan endi ǵana es jıyp, úı-jaı, qora-qopsylaryn jóndeýde. Kóktem saıyn keletin tabıǵat apatynan olar biraz qıyndyqtar kórdi. Qazir jaǵdaı ornyqty, oblys, aýdan ákimdikteri tarapynan barlyq kómek, qoldaý kórsetilýde. Qazir sý shaıyp ketken joldar jóndelýde. Sý tasqyny saldarynan jaramsyz bolyp qalǵan Ashysý ózeninen ótetin kópir qalpyna keledi dep otyr. Biz habarlasqan sý tasqynynan zardap shekkenderdiń biri, kóp balaly ana, «Kúmis alqa» ıegeri Gúlsim Manzýlova osy aýylda 30 jyldan beri turady eken. – Sońǵy ret 2013 jyly tabıǵattyń tosyn minezine tap bolǵan edik. Bul joly keshke qaraı úıdiń ishine kirgen sý edendi kóterip ketti. Abyroı bolǵanda aýyl tur­ǵyndary din aman. Aýdanmen baılanys úzilgen joq. Qazir gýmanıtarlyq kómek, azyq-túlik pen dári-dármek jet­kizildi. Bárimiz de aman-esenbiz. Bir kisi­deı bolyp bala-shaǵamyzdyń bola­sha­ǵy úshin baryp daýys berdik, – deıdi Gúlsim apaı. Aýyl ákimi Ǵalym Ámenovtiń aıtýynsha, sý tasqyny kezinde aýyl turǵyn­dary aman, mal shyǵyny bolǵan joq. Gúl­sim aıtqan, sý kirgen úıler de jón­deledi. Qazir bul másele qolǵa alynǵan. Aýylǵa Tarazdan, Nazarbaev zııat­kerlik mektepterinen kómek kórseti­lipti. «Jas Otan» jastar qanaty kelip, aqsaqal­dar­dyń úı jaıyn, qora qopsylaryn tazartyp, aǵashtar egipti. Tasqynnyń da beti qaıtqan. «Biz Prezıdent saılaýy ótetin kúnge daıyndaldyq. 2015 jyldyń 26 sáýiri esimizde jaqsylyq kún bolyp qal­syn dep yrymdadyq», – deıdi aýyl ákimi. Teńdik aýylynda 358 saılaýshy bar eken. Aýyldyqtar erteńgilik jaqsy kóńil kúımen kelip daýys beripti. «Ta­bıǵat apaty aıtyp kelmeıdi. Ǵumyr boıy osy jerde turamyz. El men jer, aýyl ózimizdiki. Úkimet, ákimdik aýylǵa qaraı­lasyp jatyr», – deıdi aýyldyq azamattar. Biz telefon arqyly habar­las­qan Nesken Málkova apamyz ben Álim­jan Ábishev atamyz aýyldastarynyń jas-kárisi bar elimizdiń bolashaǵy úshin bul mańyzdy sharaǵa mán berip daýys bergenderin, aldaǵy jaqsy kúnder­ge senim bildiretinderin jetkiz­di. Shalǵaı­daǵy bólim­shelerge eki kisi atpen baryp, malshy qaýymnyń da saılaýdan tys qalmaýyn qamtama­syz etipti. Farıda BYQAI, «Egemen Qazaqstan».  Pavlodar oblysy, Baıanaýyl aýdany.