«Jánnat» – destrýktıvti dinı aǵymdardyń qateri týraly qoıylym. Otbasynyń arqasúıer azamaty dúnıe salǵannan keıin balasy Súıinish radıkaldy dinı uıymnyń qataryna qosylady. Sanasyn tuman, kóńilin kúmán torlaǵan jas jigit qazaqy tanym-túsinikke qyryn qaraı bastaıdy. Aqyry janashyr adamdar baýyrlarynan, eń qorqynyshtysy, týǵan anasynan alystaı bastaǵan jigitti otbasyna qaıtarýdyń amalyn izdeıdi.
«Qoǵamdaǵy kóptegen búliktiń basy bolyp otyrǵan dinı aǵymdardyń ıdeologııasyna óner arqyly qarsy turýdy kózdedik. Týra joldan taıyp, opyq jegenderdiń jan azabyn kórgen jurt budan ómirlik sabaq alady degen senimdemin», deıdi jastar teatrynyń jetekshisi ári qoıylymdaǵy ana rólin somdaǵan Gúlnur Qaıyrlıeva.
Qoıylym rejısseri Muqanǵalı Tomanov budan buryn Shyńǵys Aıtmatovtyń «Máńgúrt», Raqymjan Otarbaevtyń «Bas», Iran-Ǵaıyptyń «Súıinbaı» dramalarymen tanys. Onyń kirisken jumystaryn saraptaı otyryp, shyǵarmashylyq zerthanasynda adam janyn basty orynǵa qoıatynyn baıqaımyz.
«Men árbir qoıylymda adamnyń syrtqy kelbetinen buryn janyna úńilýge, ishki jan dúnıesin ashýǵa basa mán beremin. Kópshilik adam qazir ómirinde ne bolyp jatqanyn eshkimge, tipti jaqyndaryna da bildirmeıdi. Mine, men sony ashyp kórsetýge tyrysamyn. Bul rette uzyn-sonar monologter emes, emosııa, plastıkalyq sheshimder arqyly ishki kóńil kúıdi jetkizý mańyzdy. Teatr degen únemi ózgerip, damyp otyratyn qubylys tárizdi, sondyqtan naǵyz shyǵarmashylyq izdenister men jetistikter alda degim keledi», deıdi rejısser.
Al ekinshi qoıylym – bıyl týǵanyna 100 jyl tolyp jatqan kórnekti jazýshy Berdibek Soqpaqbaevtyń povesi boıynsha daıyndalǵan «Meniń atym Qoja» spektakli. Akterlerdiń obrazy kópshiliktiń kóńilinde jaqsy jattalǵan, Abdolla Qarsaqbaev túsirgen fılmnen alshaq ketpegen.
Budan bólek, teatr repertýarynda «Úılený ońaı» komedııasy men «Kleopatra» dramasy bar. Teatr dırektory Ámirjan Nurlanulynyń aıtýynsha, aldaǵy ýaqytta ujym Astanadaǵy Mýzykalyq jas kórermen teatrymen selbestik ornatyp, birlese jumys isteýdi josparlap otyr.
