Sýretterdi túsirgen – Erlan OMAR, «EQ»
Saqa oıynshyǵa senim artpaq
Kókpar men kókbóri oıyndarynyń tartysy «Qazanat» ıppodromynda 9-12 qyrkúıek aralyǵynda ótedi. Dúbirli dodaǵa qatysatyn elimizdiń kókpar quramasy Astana qalasynda oqý-jattyǵý jıynyn ótkizip jatyr. Bas bapkerlik qyzmetke taǵaıyndalǵanyna kóp ýaqyt óte qoımaǵan Aqylbaı Mankeev ózine orasan jaýapkershilik júktelgenin, ulttyq qurama músheleri baryn salatynyn aıtty.
«Dúnıejúzilik kóshpeliler oıyndaryna daıyndyqty kúsheıtý maqsatynda oqý-jattyǵý jıyny birneshe kezeńmen ótti. Negizinen Almaty oblysyndaǵy arnaıy jabdyqtalǵan alańda ázirlik júrgizdik. Astana qalasyna tamyzdyń sońyna taman keldik. Saryarqanyń sary jeli soǵyp, kúzdiń lebi erte baıqalatyn óńirge jersiný attarymyzǵa aýyr tıdi. Ulttyq qurama músheleri minetin attardyń basym kópshiligi ońtústik oblystardaǵy kókpar komandalarynan jalǵa alyndy. Tabıǵaty janǵa jaıly jaımashýaq óńirde ósken janýarlar Astanaǵa kelgende aýyrdy. Tipti sýdy da bastapqyda ishe almady. Biraq veterınar mamandar, atbegilerdiń kómegimen qaıta qońdanyp jerge de úırenise bastady. Dúnıejúzilik kóshpeliler oıyndarynda kókpardan ǵana emes, qyrǵyzdyń kókbóri oıynynan da, ıaǵnı qazandyqqa salym salatyn tartystan da dodaǵa kiremiz. Biraq bizdiń kókparshylar birneshe jyldan beri tek sheńberge tartatyndyqtan, qazandyqqa oınap júrgen joq», dedi A.Mankeev.
Bas bapker kókbórige qosatyn attardyń ushqyrlyǵy men ábjildigine basa mán beriletinin de atap ótti.
«Birneshe jyldan beri qazandyqqa oınaýdy doǵarǵandyqtan, attar da úırenise almaıdy. Qazandyqqa jetkende ıesi tizgin tartpasa da, at ózdiginen toqtaı alýy kerek. Jerden kókpardy ilip alǵan balýannyń aty top arasynan sýyrylyp shyǵyp, qazandyqqa qaraı qustaı ushyp jetip kilt kidirýge tıis. Bizdiń kókpardyń attary buǵan úırenbegendikten, aǵyzyp óte shyǵady. Jasyryp qaıtemiz, jekpe-jekke qoıatyn quramada senimdi at bolmaı tur. Kókpardan chempıon atanýǵa barymyzdy salamyz. Eki jyl buryn Túrkııanyń Iznık qalasynda ótken Dúnıejúzilik kóshpeliler oıyndarynda kókpardan Qazaqstan ulttyq quramasy chempıon atandy. О́zbekstan kókparshylaryn da, Mońǵolııa quramasyn da iri eseppen utyp, fınalda qyrǵyz qarsylastaryn eńserip, elge zor mereımen oralǵan edi. Sol bıikten tómendemeýge tyrysamyz. Al kókbóriden qyrǵyzdan asyp túsýge áleýetimiz tolyq jetedi dep kesip aıtý qıyn. Onyń sebebin joǵaryda aıttym, eń birinshi attardyń daıyndyǵy jetkilikti emes. 2016 jyldan beri elimizde kókpardan qazandyqqa tartys ótken emes. Segiz jyldyń ishinde kókparshylar da qazandyqqa salym salmaǵandyqtan umyta bastaǵan. Jappaı kókparǵa qatysyp júrgen balýandardyń deni jastar. Bular qazandyqqa tartyp úırenbegen. Sondyqtan kókbóri dodasyna qatysatyn komandaǵa erteden tartysqa túsip shyńdalǵan, tájirıbeli, saqa kókparshylardy shaqyryp otyrmyz. Kókpar dodasyna qatysqan kókparshy kókbóri saıysyna qatyspaıdy. Iаǵnı 12 adamnan jasaqtalǵan komandaǵa attardy taýyp, ol tulpardy kókparshy tizgindep yrqyna úıretkenshe de az ýaqyt ketpeıdi. Jýyrda kókbóri oıynyna arnaıy Qyrǵyzstannan arǵymaq satyp ákeldi. Mýrdash esimdi júırikti quramadaǵy birneshe shabandoz alma-kezek minip júr, dodaǵa deıin kimniń taqymyna yńǵaıly ekenin baıqap kóremiz. Kókbóri oıynyna úırengen bul atty qaı kókparshynyń tizgindeıtinin qorytyndy oqý-jattyǵý jıyny barysynda naqtylaımyz», dedi A.Mankeev.
Bilikti maman tym az ýaqyt qalǵanda kókbóri Dúnıejúzilik kóshpeliler oıyndarynyń baǵdarlamasyna qosylǵandyqtan da daıyndyqtyń kemshin soǵyp turǵanyna qynjylys bildirdi. Sol sebepti de kókbóriden komanda qataryna erterekte qazandyqqa kókpar tartqan, búginde jasy qyryqty qýalap, elýdi eńsergen óz qatarlastaryn da shaqyryp, tyǵyryqtan shyǵýdyń qamyn jasaǵanyn aıtty. 2022 jyly Túrkııada ótken etnosport alamanynda kókpardan komanda kapıtany mindetin atqaryp, jigitterdi dodaǵa bastap kirgen Ulan Baıtóreevti de bas bapker komandaǵa shaqyrtypty.
«Túrkııada ótken IV Dúnıejúzilik kóshpeliler oıyndarynda komanda kapıtany bolǵandyqtan, zor jaýapkershilik júktelgen edi. Bul joly da aıanyp qalmaımyz. Astana qalasyna erte kelip, alańǵa boıymyzdy úıretip, attarymyz da jersindi. «Qazanat» ıppodromyna kúrdeli jóndeý jumystary júrgizilip, adam tanymastaı túlep, túrlenip shyǵa kelipti. Zamanaýı úlgide jabdyqtalǵan keshende barlyǵy bar. Kókpar men kókbóri oıyny ótetin alańǵa arnaıy qum sebilip, attardyń tuıaǵyna da jumsaq, jaıly ekeni kóńilimizdi ósirdi. Osyndaı qoldaýdyń óteýine jeńis tartý etý úshin barymyzdy salamyz», dedi U.Baıtóreev.
Meımandardy kútýge saqadaı saı
Dúnıejúzilik kóshpeliler oıyndaryna daıyndyq aıasynda elorda ákimdiginde kompanııalarǵa, qonaqúıler men kásipkerlerge oıynǵa qatysýshylar men qonaqtardy qabyldaýǵa daıyn ekenin rastaıtyn sertıfıkattar saltanatty túrde tabystaldy.
Qalalyq máslıhat tóraǵasy Erlan Qanalımov, V Dúnıejúzilik kóshpeliler oıyndaryn daıyndaý jáne ótkizý dıreksııasynyń basshysy Naıl Nurov, ınvestısııalar jáne kásipkerlikti damytý basqarmasynyń basshysy Halel Ákimjanov etnosport alamanyna keletin meımandardy qabyldaıtyn ujymdarǵa sáttilik tiledi. Saltanatty is-sharada E.Qanalımov qatysýshylarǵa shetelden kelgen qonaqtarǵa qyzmet kórsetýde daıarlyqtyń joǵary deńgeıi men servıstik qyzmettiń sapasy óte mańyzdy ekenin atap ótti.
Jarys barysynda qalanyń qonaqúıleri halyqaralyq sportshylar men ártisterdi qabyldaıdy, al otandyq kompanııalar oıyn uıymdastyrýshylarymen birlesip týrısterge eldiń mádenı murasyn áıgileıtin ónimderdi usynady. Sondaı-aq irikteýden ótken qoǵamdyq tamaqtandyrý nysandary oıyndardyń negizgi alańdarynda jankúıerler men qatysýshylardy sapaly aspen qamtamasyz etedi. Sertıfıkat 52 qoǵamdyq tamaqtandyrý kompanııasyna, kádesyılar usynatyn 20 kompanııa, jarysqa qatysýshylar toqtaıtyn 22 qonaqúı ıelerine berildi.
Dúbirli dodaǵa tartý – tegin ınternet
Eldegi jetekshi mobıldi operator sanalatyn «Kcell» V Dúnıejúzilik kóshpeliler oıyndarynyń resmı baılanys seriktesi atandy. Saıys ótetin sport nysandarynda baılanys qurylǵylary men qosymsha bazalyq stansalary ornatylyp jatyr.
«Kcell» kompanııasynyń tehnıkalyq toby «Astana-Arena» stadıony, «Qazanat» atshabary, J.Úshkempirov atyndaǵy jekpe-jek saraıy, «Alaý» muzaıdyny saraıy, «Qazaqstan» jeńil atletıka kesheni, Ulttyq mýzeı, «Dýman» oıyn-saýyq kesheni aýmaǵyna qosymsha 4G jáne 5G bazalyq stansalary men telekomýnıkasııalyq jabdyqtaryn ornatady. Osylaısha, kompanııa ujymy sheteldik qonaqtar men qatysýshy sportshylarǵa óz elderimen esh kedergisiz beınebaılanysqa shyǵyp, áleýmettik jelilerge foto, vıdeo materıaldardy jedel júkteýge, taratýǵa, barlyq sıfrlyq servısterdi úzdiksiz paıdalanýǵa múmkindik týǵyzbaq.
«Biz ulttyq baılanys operatory retinde bul oıyndardyń jaýapkershiligi joǵary ekenin túsinemiz. Sondyqtan osy halyqaralyq is-sharany joǵary deńgeıde uıymdastyrýǵa úles qosýdy azamattyq paryz sanadyq. Sheteldik qonaqtar men sportshylardy sapaly baılanyspen qamtamasyz etý – óte mańyzdy mindet. Sol úshin bizdiń mamandar jarys ótetin sport nysandarynda tıisti jumysty atqaryp jatyr. «Kcell» elimizdiń halyqaralyq arenadaǵy mereıin asyryp, bedelin kóterýge baǵyttalǵan jobalardy qoldaýǵa ázir. Eldegi eń iri baılanys operatory retinde 2010 jyly Astanada ótken EQYU Sammıtiniń resmı seriktesi boldy. 2011 jyly Qysqy Azıadanyń da resmı baılanys operatory atandy. Endi Dúnıejúzilik kóshpeliler oıyndarynan da tys qalmadyq. Bul is-sharany elimiz joǵary deńgeıde ótkizetinine senimdimin», dedi «Kcell» AQ basqarma tóraǵasy Asqar Jambakın.
V Dúnıejúzilik kóshpeliler oıyndaryn daıyndaý jáne ótkizý jónindegi dıreksııa basshysy Naıl Nurov etnosport oıyndarynyń resmı baılanys operatory atanǵan «Kcell» kompanııasymen tize qosyp jumys atqarýǵa árqashan beıil ekenin jetkizdi.
«Dúnıejúzilik kóshpeliler oıyndary aıasynda «Kcell» kompanııasymen yntymaqtastyq ornatý – qatysýshylardy, sportshylardy, jattyqtyrýshylardy, tóreshilerdi, eriktiler men uıymdastyrýshylardy sapaly uıaly baılanyspen jáne tegin ınternetpen qamtamasyz etýge baǵyttalǵan strategııalyq mańyzdy qadam. Oıyndardy sátti ótkizýge jáne osy aýqymdy is-sharanyń barlyq kezeńinde baılanys ornatýǵa úles qosyp, senimdi kommýnıkasııalyq ınfraqurylym jasaýǵa atsalysqany úshin «Kcell» kompanııasyna rızashylyǵymyzdy bildiremiz», dedi N.Nurov.
«Kcell» kompanııasy Dúnıejúzilik kóshpeliler oıyndarynyń ınfraqurylymyna baılanys jelilerin tartyp qana qoımaı, alamanǵa qatysatyn ár sportshyǵa, eriktilerge, sondaı-aq uıymdastyrý komıtetiniń barlyq múshesine 5G ınterneti men baılanysy bar sım-kartalardy tegin taratpaq. Buǵan qosa kompanııa sport keshenderinde Wi-Fi-sıgnalyn taratatyn arnaıy 5G-roýterlaryn ornatyp, kópshilikke SMS habarlamalar joldap, dúbirli dodadan qulaǵdar etýdi josparlap otyr.
