Sýret: ashyq derekkózden
Oblystyq jer qatynastary basqarmasy basshysynyń orynbasary Álibek Ermekqalıdyń aıtýynsha, Jer kodeksine engizilgen ózgertýlerge sáıkes endi jer teliminiń 50 paıyzy paıdalanylmasa, memleket menshigine qaıtarylady. Bıyl munaıly óńirde ıgerilmegen 90 myń gektar jer ýchaskesin memleket menshigine qaıtarý josparlanypty.
«Qazir oblys aýmaǵynda paıdalaný merzimi ótken jer telimderi áli bar. Sondaı jer ýchaskeleri ǵaryshtyq monıtorıng arqyly anyqtalady. Osyǵan oraı monıtorıngtik top músheleri ıelerine paıdalaný merzimi ótip ketken jer telimderin óz erkimen qaıtarý jóninde túsindirý jumysyn júrgizýdi qolǵa aldy. Sonyń nátıjesinde turǵyndar jer telimderiniń kóp bóligin óz erkimen qaıtardy. Endi olarǵa qaıtadan konkýrsqa qatysyp, jer telimin ıelený múmkindigi beriledi», deıdi Á.Ermekqalı. Onyń deregine súıensek, 2022–2023 jyldary 400 myń gektardan astam jer telimi memlekettiń ıeligine qaıtarylǵan. Byltyr 275 jer telimi memleket menshigine ótkizilgen.
«Memleket menshigine qaıtarylǵan jer telimderi úshin qaıtadan konkýrs ótkiziledi. Bıyl jeti aıda 87 jer ýchaskesi konkýrs arqyly qaıtadan jer paıdalanýshylarǵa berildi», dep málimdedi Á.Ermekqalı.
Aýyl sharýashylyǵy mınıstrligi Jer resýrstaryn basqarý komıtetiniń tóraǵasy Murat Temirjanovtyń málimetine júginsek, Atyraý oblysynda jer telimine nemquraıdy qaraý deregi kezdesedi. Sondaı derek jerdi búldirý jáne jer ýchaskelerin nysanaly maqsatyna saı paıdalanbaýǵa baılanysty anyqtalǵan.
«Atyraý oblystyq jer resýrstaryn basqarý departamentiniń qyzmetkerleri topyraqtyń qunarly qabatyn zańsyz sydyryp alý jáne joıý faktisi boıynsha Ákimshilik quqyq buzýshylyq týraly kodekstiń 337-babynyń 1-bóligimen «AssanaDorStroı» JShS-ǵa nusqama berip, 1 mln 292 myń 200 teńge kóleminde aıyppul salyndy. Qazir departamenttiń nusqamasy negizinde atalǵan jer ýchaskesi qalpyna keltirildi», dep habarlady M.Temirjanov.
Maqat aýdanynda kásipkerlikti damytý úshin berilgen jalpy kólemi 130 gektardy quraıtyn 3 jer ýchaskesi nysanaly maqsatyna saı ıgerilmegen. Osyǵan baılanysty óńirlik departament mamandary jer ıelerine 1 jyl merzim ishinde nysanaly maqsatyna saı ıgerý qajettigi týraly nusqama bergen eken. Maqat aýdanynyń soty departamenttiń Jer kodeksiniń 94-babyna sáıkes jer ýchaskelerin májúrlep alyp qoıý týraly talap-aryzyn qanaǵattandyrdy. Jer ýchaskeleri memleket menshigine ótti.
Atyraý oblysy
