Atalǵan aýyl Taıynsha qalasynan 25 shaqyrym qashyqtyqta ornalasqan. Turǵyndardyń aıtýyna qaraǵanda, aýyl tarıhy 1909 jyldan bastalady. Bul stolypındik reaksııa jyldarynda orys, ýkraın sharýalaryn Qazaqstanǵa sharýashylyq kolonııa jasaý maqsatymen kúshpen kóshirilgen jyldary paıda bolǵan. Aýyldyń qazaq tilindegi toponomıkalyq ataýy bar, ázirge ony qalpyna keltirýge múmkindik bolmaı tur.
Konstıtýsııa kúni paıdalanýǵa berilgen jańa ǵımarattyń ashylýynda oblys ákimi Ǵaýez Nurmuhambetov Taıynsha aýdanynda budan basqa da birneshe mektep qurylysy júrgizilip jatqanyn jetkizdi.
«Bul aýdandaǵy apatty jaǵdaıda turǵan bilim oshaǵynyń biri edi. Biz muny memlekettik ınfraqurylymdyq damý qory boıynsha bólingen qarajattyń esebinen qysqa merzimde salyp shyqtyq. О́z basym, qurylys jumystaryn qysqa merzimde sapaly etip júrgizgen merdigerge alǵysymdy aıtamyn. Qurylysty buǵan deıin birneshe kelip, baqylap kettim. Jańa ǵımarat kóńilimizden shyǵyp otyr», dedi ol.
Ekiqabatty ǵımarattyń qurylysy bıylǵy mamyr aıynda bastalyp, tamyzdyń sońynda aıaqtaldy. Ony «Zertteý SK» qurylys kompanııasy júrgizdi. Qurylys jobasyna 1 mlrd teńge qarajat bólingen. Mektep ǵımaraty 120 oqýshyǵa arnalǵan. Barlyq kabınet talapqa saı jabdyqtalǵan.
«Qazir mundaı mektep biz sekildi eldi mekenderde neken-saıaq. Bizdiń mindetimiz –Úkimettiń osyndaı qamqorlyǵyna saı laıyqty eńbek etý. Qazir mektepte 28 muǵalim bar. Bir ókinishtisi, oqýshy sany jyldan-jylǵa azaıyp barady. Bıyl 8 bala ǵana mektep tabaldyryǵyn alǵash attap otyr», deıdi atalǵan bilim mekemesiniń dırektory Murat Kúlenov.
Aıta keteıik, bıyl Soltústik Qazaqstan óńirinde 3 jańa mektep ǵımaraty ashylyp, onda 1 500 oqýshy bilim alady. Sonymen birge eki balabaqsha paıdalanýǵa beriledi.
Soltústik Qazaqstan oblysy
