Infografıkany jasaǵan – Záýresh SMAǴUL, «EQ»
Oblysta Prezıdent bastamasymen qolǵa alynǵan «Jaıly mektep» ulttyq jobasy aıasynda 21 mektep salý josparlanǵan. On mekteptiń qurylysy bıyl aıaqtalsa, qalǵany keler jyly qoldanysqa beriledi.
«Bilim berý ınfraqurylymyn qoldaý qory» esebinen oblys ortalyǵynda fızıka-matematıka baǵytyndaǵy daryndy balalarǵa arnalǵan 400 oryndyq mektep-ınternat qurylysy bastaldy. Jaqynda quny 10 mlrd 900 mln teńge bolatyn «Shyǵarmashylyq ınnovasııalyq ortalyqtyń» irgetasy qalandy.
Jańa oqý jylynda 17 000-nan astam bala 1-synypqa qabyldandy. Mektep tabaldyryǵyn endi attaǵan jetkinshekterdiń 93,1 paıyzy memlekettik tilde bilim alady. Birinshi synypqa baratyn oqýshylardyń 8 myńnan astamy Qyzylorda qalasynan bolsa, odan keıingi orynda – Jańaqorǵan aýdany tur. Onda 1 708 bala alǵash mektep tabaldyryǵyn attady. Al Shıeli aýdanynda 1 600-den astam jetkinshek birinshi synypqa bardy. 2024–2025 oqý jylynda 297 memlekettik jáne 33 jeke mektepte 184 856 bala bilim alady. Osylardyń 10 452-si 11-synyp oqýshylary.
Jaqyn kúnderi Qyzylorda qalasyndaǵy sol jaǵalaý shaǵyn aýdanynan «Jaıly mektep» jobasy aıasynda 900 orynǵa arnalǵan jańa mektep paıdalanýǵa berilmek.
1 qyrkúıek qarsańynda Shıeli aýdanynda 988 mln teńgege boı kótergen 100 oryndyq mektep qoldanysqa berildi. Osy kúnderi Jańaqorǵan aýdanynyń Baıkenje aýylynan jergilikti bıýdjet esebinen 926 mln teńgege salynǵan 150 oryndyq bilim ordasy ashyldy.
Sondaı-aq osy salaǵa ınvestısııa salatyn kásipkerler qatary da artyp otyr. El jaǵdaıyna alańdaǵan azamattardyń arqasynda Aral aýdany Toqabaı aýylyndaǵy apatty mektep ornyna jańa ǵımarat jáne Aqshataý aýylynda bastaýysh mektep boı kóterip, jańa oqý jylynda paıdalanýǵa berildi.
Oblysta 2023–2029 jyldarǵa arnalǵan bilim júıesin damytý jol kartasy boıynsha aldaǵy 7 jylda biraz másele sheshimin tabady. Osy ýaqyt aralyǵynda mektepke deıingi bilim beretin 12 uıymǵa kúrdeli, 160 nysanǵa aǵymdaǵy jóndeý júrgiziledi. Joǵary oqý oryndary bazasynda mektepke deıingi bilim berý uıymdary pedagogterin qaıta daıarlaý, biliktiligin arttyrý qolǵa alynady. Seksen balabaqsha kompıýterlik tehnıka men ınteraktıvti paneldermen, 40 balabaqsha oıyn alańdarymen jaraqtalyp, shaǵyn sáýlet nysandary jańartylady.
Salaǵa qoldaýdyń qaıtarymy da joq emes. Syr óńiri sońǵy tórt jylda Ulttyq biryńǵaı testileý kórsetkishinde respýblıkada alǵashqy úshtikte bolatyn. Memlekettik grant konkýrsyna qatysqandardyń 76 paıyzy, ıaǵnı 4 752 oqýshy elimizdiń bedeldi joǵary oqý oryndaryna túsken osy jyly aımaq elimizde kósh bastap, alǵashqy orynnan kórindi. Budan bólek, turmysy tómen otbasy balalary úshin aımaq suranysyn eskere otyryp, qajettiligi joǵary mamandyqtarǵa oblys ákiminiń 100 granty bólindi.
Jyl saıyn oblys ortalyǵyna qonystanýshylar qatary artyp, mektepterde oryn tapshylyǵy baıqala bastaǵan. О́tken jyly osyndaı 4 mektepke qosymsha 1 myń 850 orynǵa arnalǵan ǵımarat salyndy. Qarjy únemdeýge sep bolatyn osy tásil arqyly bıyl Shıeli, Jańaqorǵan aýdandarynda 2 mektepke 375 oryn qosylyp, Qyzylorda qalasyndaǵy №4 mektepke oqý korpýsy men ashana, Qarmaqshy aýdanynda №284 mektep-ınternatyna sportzal salyndy. Osy jazda oblystyq bıýdjet esebinen 3 mlrd 100 mln teńgege qala men aýdandarda 8 mektep kúrdeli jóndeýden ótti.
Sonymen qatar óńirde jeke mektepter qatary da artyp keledi. Bıyldyń ózinde olardyń qataryna 7 mektep qosylyp, jańa oqý jylynda oblystaǵy osyndaı bilim oshaqtarynyń sany 40-qa jetedi.
Qyzylorda
