Foto:senate.parlam.kz
Palatanyń jańa sessııadaǵy alǵashqy otyrysyn ashqan Máýlen Áshimbaev Senattyń aldaǵy jumysy el Prezıdentiniń Joldaýda aıtqan bastamalary men reformalary aıasynda júrgiziletinin atap ótti. Atalǵan strategııalyq baǵyttardy iske asyrý kezinde bıýdjettik jáne áleýmettik pragmatızmge, ınfraqurylymdy damytýǵa, sıfrlandyrýǵa jáne basqa da qaǵıdattarǵa basa mán berilgen.
«Kásipkerler úshin tıimdi sharttardy qamtamasyz ete otyryp, salyq rejımderin ońtaılandyrý jumystary júrgiziledi. Bank sektoryn ekonomıkaǵa kóbirek ınvestısııa salý úshin yntalandyrý sharalary da qabyldanady. Úkimet janyndaǵy Investısııalyq shtabtyń róli artyp, el ekonomıkasyna ınvestısııa tartýǵa jáne otandyq ónerkásipti qoldaýǵa baǵyttalǵan qosymsha sharalar qolǵa alynady. Orta bıznes jańa jeńildikter men artyqshylyqtarǵa ıe bolady. Sol arqyly 2029 jylǵa qaraı orta bıznestiń ekonomıkadaǵy úlesin 15 paıyzǵa deıin jetkizý úshin qolaıly jaǵdaı jasalady. Memleket basshysy energetıka sektory men kólik salasyn damytýdyń naqty joldaryn da aıqyndap berdi», dedi Senat Tóraǵasy.
Sonymen qatar Palata Spıkeri AES salý máselesine qatysty jalpyulttyq referendým ótkizý jáne kelesi jyldan bastap aýdandar men oblystyq mańyzy bar qalalardyń ákimderin tikeleı saılaý azamattardyń memlekettik sheshimder qabyldaý úderisine qatysý múmkindigin keńeıte túsetinin aıtty. Bıýdjet qarajatyn tıimdi jumsaýǵa, shyǵystardy shekteýge jáne qatań baqylaýǵa arnalǵan sharalar da qabyldanady.
«Prezıdentimiz Qasym-Jomart Kemeluly Toqaevtyń Joldaýda bergen tapsyrmalaryn iske asyrý barysynda olardy zańnamalyq turǵydan qamtamasyz etý asa mańyzdy mindet.Bul jumysty Senat Májilis pen Úkimettegi áriptesterimen jáne sarapshylarmen birlesip júrgizedi. Memleket basshysynyń Qazaqstannyń ornyqty damýyna arnalǵan barlyq bastamasyn sapaly ári ýaqtyly júzege asyrýǵa bar kúsh-jigerimizdi jumsaýymyz qajet», dedi Máýlen Áshimbaev.
Palata otyrysynda depýtattar Joldaýda aıtylǵan aýyl sharýashylyǵyn damytý, kommersııalyq bankterdiń qarajatyn tarta otyryp, agroónerkásiptik keshendi ınvestısııalaý sııaqty mindetterge de kóńil bólingen. Jumysshy mamandyqtar tujyrymdamasynyń mańyzy, eńbek qundylyqtaryn dáripteý, ult densaýlyǵyn nyǵaıtýǵa arnalǵan sharalar, azamattardy áleýmettik qoldaý júıesin jańǵyrtý jáne bilim berý sapasyn arttyrý baǵytyndaǵy basymdyqtar da sóz boldy. Ekologııalyq jaǵdaıdy jaqsartý jáne qorshaǵan ortany qorǵaý máseleleri de nazardan tys qalǵan joq.
Sondaı-aq senatorlar otyrysta «Qazaqstan Respýblıkasynyń Úkimeti men Qyrǵyz Respýblıkasynyń Mınıstrler Kabıneti arasyndaǵy «Qarasý» jáne «Aq-Tilek» avtojol ótkizý pýnktteri aýdanynda ındýstrııalyq saýda-logıstıkalyq keshendi qurý jáne onyń qyzmetin retteý týraly kelisimdi ratıfıkasııalaý týraly» zańdy qarady. Aıta keteıik, qujat ınfraqurylym nysandaryn salý úshin ınvestısııa tartý, keshendi basqarý, salyq salý, valıýtalyq baqylaý jáne ótý tártibi sııaqty máselelerdi retteıdi. Maquldanǵan zań Qazaqstan men Qyrǵyzstan arasynda óndiris, kásipkerlikti qoldaý jáne damytý salalaryndaǵy yntymaqtastyqty arttyrýǵa yqpal etedi.
Sondaı-aq Palata otyrysynda senatorlar ózderiniń depýtattyq saýaldaryn da joldady.
Sultanbek Mákejanov ekonomıkaǵa salynatyn ınvestısııa deńgeıinin tómendeýine nazar aýdaryp, ınvestorlarǵa beriletin salyqtyq jeńildikterdi paıdalanýdyń tıimdiligin synǵa aldy. Sondaı-aq ol keıbir jobalardyń qanshalyqty oryndy ekenine de nazar aýdardy.
Ásem Rahmetova Qazaqstanda ınternet-alaıaqtyqtyń beleń alǵanyna alańdaýshylyq bildirip, Úkimetti osy saladaǵy jazany qatańdatýǵa shaqyrdy. Bul rette senator aldyn alý sharalary úshin onlaın-platformalar men jedel jeliler ázirleýdi, jasandy ıntellektti engizýdi jáne halyq arasynda aqparattyq-túsindirý jumystaryn arttyrýdy usyndy.
Álibek Náýtıev Atyraý oblysynda smetalyq qunnyń ósýine baılanysty birqatar bıýdjettik ınvestısııalyq jobanyń qurylys toqtap qalýy múmkin ekenin aıtty. Senator Úkimet basshysyna jergilikti bıýdjettiń shekteýli múmkindikterin eskere otyryp, respýblıkalyq bıýdjetten túzetýlerdiń ulǵaıtylǵan somalaryn qarjylandyrý múmkindigin qarastyrýdy usyndy.
Rýslan Rústemov Qyzylorda oblysynda kúrish sharýashylyǵynyń damýyna kedergi keltiretin problemalardy atap ótti. Senator qalyptasqan jaǵdaıdy sheshý úshin ǵylymı negizdelgen jáne ınnovasııalyq ádisterdi engizý kerektigin aıtty. Osyǵan baılanysty ol Qazaq kúrish sharýashylyǵy ǵylymı-zertteý ınstıtýtynyń ǵylymı-tehnıkalyq ınfraqurylymyn qaıta qurý jóninde usynys jasady.
Ǵalıasqar Sarybaev Jetisý oblysynyń turǵyndarymen kezdesý kezinde kóterilgen óńirdegi ózekti máselelerge toqtaldy. Depýtat sý basý aımaǵynda ornalasqan aýyl mańynda Alakól kóliniń qorshaý bógeti joq ekenin aıtyp, alańdaýshylyq bildirdi. Sondaı-aq senator Balqash kóliniń jaǵalaýyndaǵy ınjenerlik jelilerdiń jaı-kúıine de erekshe nazar aýdardy.
Arman О́teǵulov agroónerkásiptik sektordyń damýyn tejeıtin problemalardy atap kórsetip, olardy sheshý joldaryn usyndy. Ol osyndaı sharalardyń biri otandyq sharýalardyń ımporttyq tuqymdarǵa táýeldiligin joıý jáne eksportty ulǵaıtý boıynsha arnaıy baǵdarlama ázirleý ekenin aıtty.
