Oblys ákiminiń orynbasary Ertaı Altaev semınardyń birlikti nyǵaıtýda mańyzy erekshe ekenin aıta kele, Memleket basshysynyń QHA sessııasynda bergen tapsyrmalarynyń oryndalý barysyna, aldaǵy atqarar maqsat-mindetterge toqtaldy. Prezıdent Ákimshiligi QHA Hatshylyǵy meńgerýshisiniń orynbasary Ǵalymjan Mahan, Mádenıet jáne aqparat mınıstrligi etnosaralyq qatynastardy damytý komıtetiniń tóraǵasy Ǵalym Shoıkın sóz sóılep, suraq-jaýap túrinde jıynǵa qatysýshylarmen ózekti máseleler tóńireginde pikir almasty.
Elimizdegi etnostardy uıystyryp otyrǵan Assambleıa otanshyldyqty dáripteıtin ınstıtýt retinde damyp keledi. Byltyr Aqsaqaldar keńesi men etnomedıasııa ınstıtýty quryldy. Bul baǵyttaǵy jumystarǵa Prezıdent oń baǵa berip, odan ári jandandyrýdy tapsyrǵan. Qazir Túrkistan, Jambyl oblystarynda etnosaralyq alaýyzdyqtyń aldyn alý jumystary tıimdi júrip jatyr. Sondaı-aq Ǵalym Shoıkın 2 mıllıonnan astam turǵyny bar Túrkistan oblysynda 50-den asa etnos ókilderi tatý-tátti yntymaqta ómir súrip jatqanyn atap ótti.
«Oblysta memlekettik tildi meńgergen etnos ókilderi de az emes, bul turǵyda másele joq deýge bolady. Degenmen etnosaralyq faktordy saıasılandyrýǵa jáne bul máselede arandatýshylyq sıpattaǵy talqylaýlarǵa múlde jol bermeý baǵytyndaǵy jumystardy kúsheıtý mańyzdy. Qazir aqparat dáýiri, kóp azamat, ásirese jastar aqparatty áleýmettik jeli arqyly alyp otyr. Osy oraıda feık aqparattarmen kúres jumystaryna mán berý qajet. Assambleıanyń basty mıssııasy – barlyq etnosty qazaq halqynyń mańyna uıystyryp, bir shańyraq astyna jınaý. Qazaqstan halqy Assambleıasynyń XXXIII sessııasynda Prezıdent Qasym-Jomart Toqaev qoǵamǵa iritki salatyn árbir áreketke tosqaýyl qoıylýy kerektigin qadap aıtty. Qazaqstan – beıbitshilikti tý etken, 100-den astam etnos ókilin baýyryna basqan kıeli meken. Biz – demokratııaǵa den qoıǵan quqyqtyq elmiz. Bul rette elimiz 100-den asa halyqaralyq konvensııaǵa, kelisimge, deklarasııaǵa qol qoıǵan. Iаǵnı qoǵamda ultyna qaraı erekshelenýge, oqshaýlanýǵa umtylǵan kez kelgen áreketke, ásirese azamattardy tiline, ultyna, dinine nemese mádenıetine bola arandatýǵa, ıa bolmasa kemsitýge múlde jol bermeıtin orta qalyptastyrý mańyzdy. Bul oraıda búgingi semınardyń bárimiz úshin mańyzy joǵary dep esepteımin. Toleranttylyq qaǵıdasyn ustanyp, birtutastyqqa syna qaǵýshylarǵa qarsy ımmýnıtet qalyptastyrýymyz kerek. Árıne, bul rette Assambleıaǵa artylar jaýapkershilik zor. Sondyqtan bul ınstıtýtty jan-jaqty jańǵyrtý jumystary jalǵasa bermek», dedi etnosaralyq qatynastardy damytý komıtetiniń tóraǵasy.
Aýdan, qalalardaǵy bilim bólimderiniń tárbıe isi jónindegi ádiskerleri, etnos ókilderi, jalpy jáne orta arnaýly oqý oryndary dırektorlary men olardyń tárbıe isi jónindegi orynbasarlary, «Qoǵamdyq kelisim» KMM-niń aýdandyq, qalalyq fılıaldarynyń basshylary qatysqan jıynda qoǵamdyq kelisimdi nyǵaıtý jumystaryn BAQ-ta jandandyrý, jalǵan aqparattyń taralýyna qarsy zań aıasynda aqparattyq-túsindirý jumystaryn kúsheıtý jáne ózekti máselelerdi, usynystardy talqylaý, aqparattyq jumystardy jetildirý jaıy da ortaǵa salyndy. Bul oraıda «Parasat» medıasııa jáne quqyq ortalyǵynyń sarapshy-konflıktologi Salamat Jumaǵulov, Qoldanbaly etnosaıası zertteýler ınstıtýty qoldanbaly zertteýler ortalyǵynyń dırektory Ǵalı Dinmuhammed tájirıbelerimen bólisip, baıandama jasady.
Semınardy qorytyndylaǵan oblys ákiminiń orynbasary Ertaı Kenjebekuly alda turǵan birqatar mindetti aıta kele, óńirde etnosaralyq kelisimdi saqtaý, jas urpaqty patrıotızmge tárbıeleý isinde kúsh biriktire otyryp jumys isteýge senim bildirdi.
Aıta ketelik, búginde oblystaǵy QHA janynda 11 etnomádenı birlestik pen 6 qurylym jumys isteıdi. Etnos ókilderiniń 92 paıyzy memlekettik tildi jetik meńgergen.
Túrkistan oblysy
