Sýretti túsirgen – Erlan OMAR, «EQ»
Oqý jyly bastalǵanda Densaýlyq saqtaý mınıstrligi ata-analarǵa keńes jarııalady. Onda qımyldyń azdyǵy, gadjetterdi shamadan tys paıdalaný sekildi kúndelikti eskermeıtin ádetter bala densaýlyǵyna teris áser etip, kórý qabiletin nasharlatatyny eskertilgen. Mundaıda balaǵa boıyn tiktep ustamaý, bir nársege zeıin qoımaý syndy qaýip týyndaýy da múmkin eken. Retsiz telefonǵa úńilý uıqynyń buzylýyna ákeledi. Onyń ústine keıbir oqýshylardyń boıynda qazirden sozylmaly aýrýlar, artyq salmaq, tipti semizdik baıqalady. Densaýlyq saqtaý mınıstrligi men Qoǵamdyq densaýlyq saqtaý ulttyq ortalyǵy oqý jylynda balalardyń densaýlyǵyn saqtap, nyǵaıtý úshin birneshe mańyzdy talapty usynady. Sonyń birsypyrasyn tómende keltirgendi jón kórdik.
Oqý jylynda balańyzdyń densaýlyǵy myǵym bolyp, durys damysyn deseńiz, balanyń kún tártibin durys qurýdan bastaý qajet. Tómengi synyptar úshin úı tapsyrmasyn 1,5–2 saǵattan aspaıtyn ýaqytta, al joǵary synyptar úshin 3–4 saǵatta árbir 40 mınýt saıyn úzilis jasaı otyryp oryndatý qajet eken. Sosyn balanyń uıqysy qanyq bolǵany mańyzdy. Kúndelikti 7–10 jastaǵy balalar – 10–11 saǵat, 11–14 jastaǵy balalar – 9–10 saǵat, 15–17 jastaǵy jasóspirimder 8–9 saǵat uıyqtaýy kerek. Árıne, tamaq rasıonynan zııandy taǵamdardy alyp tastap, dárýmender qabyldaýyn qadaǵalaǵan jón. Oqýshylar jıi-jıi, ıaǵnı kúnine 4 ret tamaqtanýy kerek, al birinshi synyp oqýshylary men sportshylar 5 ret tamaqtanǵany jón. Semizdik qaýpin arttyryp, basqa da aýrýlarǵa bastaıtyn gazdalǵan sýsyndar, fast-fýd, snekterdi tutynýyn shektegen durys. Mınıstrliktiń habarlamasynda balanyń sabaq oqıtyn ornyn durys ornalastyrý, mektep kıiminiń jaıly, qaýipsiz bolýy, sómkeniń yqshamdyǵy, salmaǵy, gadjet ustaýdy shekteý, kompıýterde otyrý jıiligimen qatar gıgıenaǵa qatysty talaptar – bári-bári qamtylǵan.
