Oblystyq polısııa departamenti bastyǵynyń birinshi orynbasary Qurmet Májikenovtiń aıtýynsha, polısııa qyzmetkerleri óńir aýmaǵynda jasóspirimderdiń qaýipsizdigin qamtamasyz etý, ákimshilik quqyq buzýshylyqtyń aldyn alý maqsatynda kóptegen is-shara ótkizgen. Nátıjesinde, óńirdegi qylmys sany birshama azaıǵan.
Departament basshysynyń birinshi orynbasary keltirgen derek statıstıkalyq turǵyda kóńil kónshitkenimen, keıbir málimet oılandyrmaı qoımaıdy. Máselen, kámelet jasyna tolmaǵan balany tárbıeleý, olardyń quqyqtary men múddelerin qorǵaý jónindegi mindettemeni oryndamaǵan júzdegen ata-ana jaýapkershilikke tartylypty.
«Bala tárbıesine nemquraıdy qaraıtyn 160 otbasy anyqtalyp otyr. Sondaı-aq quqyq buzýshylyqqa jol bergen 382 jasóspirim polısııanyń esebine alyndy. Devıanttyq tárbıedegi minez-qulqyna baılanysty 18 jasóspirim arnaıy rejimdegi mektepke ornalastyryldy. Sondaı-aq 50 azamat ata-ana quqyǵynan aıyryldy nemese shettetildi. Budan bólek, 225 jasóspirim beıimdeý ortalyǵyna jóneltildi», deıdi Q. Májikenov.
О́ńirde jasóspirimderdiń qylmysy birshama azaıǵanyna qaramastan, keıbir statıstıkalyq kórsetkishtiń artqanyn ańǵarý qıyn emes. Máselen, polısııanyń esebine alynǵan jasóspirimderdiń sany ótken jyldyń mejeli merziminde 343 bolsa, osy jyly 382-ge jetken. Al bala tárbıesine nemquraıdy qaraıtyn otbasylardyń sany ótken jyly 155-ke jetse, bıyl 160-ty qurap otyr. Sondaı-aq beıimdeý ortalyǵyna ornalastyrylǵan jasóspirimderdiń sany 3-ke artqan. Osy kórsetkishter kimdi de bolsyn oılandyrmaı qoımaıdy.
«Jalpy alǵanda, kámelet jasyna tolmaǵan balany tárbıeleý, olardyń quqyqtary men múddelerin qorǵaý jónindegi mindettemeni oryndamaǵany úshin ákimshilik kodekstiń 127-babymen 617 ata-ana jaýapkershilikke tartyldy. Sondaı-aq túngi ýaqytta kóshede úlkenderdiń qaraýynsyz júrgen 5468 jasóspirim anyqtaldy. Osyǵan baılanysty ákimshilik kodekstiń 442-babyna sáıkes ata-analardyń jaýapkershiligi qaraldy. Saǵat túngi 22.00-den keıin oıyn-saýyq oryndarynda balalardyń zańdy ókilinsiz bolýyna jol bergen 156 mekeme ıeleri zań aıasynda jaýapkershilikke tartyldy», deıdi Q.Májikenov.
Qalaı desek te, jasóspirimderdiń máselesi qoǵamdy tolǵandyrmaı qoımaıtyny anyq. Olardyń qaýipsizdigin qamtamasyz etýge jergilikti atqarýshy bılik pen quqyq qorǵaý organdary mindetti bolǵanymen, ata-analar da jaýapkershilik júgin sezingeni jón. Olaı bolmaǵan jaǵdaıda másele ýshyǵa beretin sekildi.
Jambyl oblysy
