Álemge dańqy asqan Salvador Dalıdiń 61 eńbegi Astanadaǵy «Has Sanat» kórme galereıasyna jetkizilýi eleýli oqıǵa. Ekspozısııa quramyna «Karmen», «Alısa ǵajaıyptar elinde», «Dalınıan jylqylary», «Mahabbat trılogııasy» serııalarynan birneshe kórkem sýret engen. Dalı qazaq úshin asa qadirli, máni bıik jylqy ataýlyny erekshe unatsa kerek, sýretterinde kóbirek beınelegen eken. Sonymen birge kesteli týyndylar tabıǵat sazyna toly. Sirá, kez kelgen talantty ónerpaz jumbaǵynyń kilti tabıǵatpen tutasa bilýinde jatsa kerek.
Áralýan sýretterge qarap, tereń oıǵa shomasyz. Bir qaraǵanda, kózge tosyn, kóńilge oǵash kóringenmen, túıini tereń, adam oıyna orala bermeıtin beıneler mol. Tańǵajaıyp óner týyndylaryn túpnusqadan óz kózimizben tamashalap, tolaǵaı áserge bólendik.
– Bıyl sıýrrealımz janrynyń paıda bolǵanyna 100 jyl tolady. Oǵan qosa, álem Salvador Dalıdiń 120 jyldyq mereıtoıyn toılap jatyr. Osy qos aıtýly dataǵa úlesimizdi qosqymyz keldi. Bul kórmeni ótkizýge bir jyl daıyndaldyq. Munda 61 lıtografııa qoıylǵan. Olardyń barlyǵy túpnusqa. Álemniń ár elindegi kolleksıonerlerdiń jeke qorynan alyndy.
Ataqty aǵylshyn jazýshysy Lıýıs Kerroldiń «Tańǵajaıyptar álemdindegi Alısa» shyǵarmasy kópshilikke tanys. Sol ertegini Salvador Dalı qylqalamyna arqaý etken. 1969 jyly óte shekteýli serııamen 12 kórnekti sýret salyp shyqqan. Solardyń birqatary osy kórmede usynyldy, – deıdi ónertanýshy Sergeı Troshenkov.
Áıgili maıtalman myńǵa tarta sýretti dúnıege ákelgeni aıtylady. Al keıbir ónertanýshylar atpal erdiń eńbegi 2 myńnan asatynyn baıan etedi. Ne desek te, ónerpazdyń bar ómirin bir maqsatqa sarp etip, adamzat ıgiligi úshin eńbek etkeni aıqyn.
– Salvadordyń ereksheligi – ol ózi úshin jańalyq ashqan adam. Álemde eń úlken jańalyq ashqan adamnyń biri. Logotıp deımiz ǵoı, Salvador sol logotıpti jasaýdyń sheberi bolǵan. Ol fotony da meńgergen, onyń akterlik te sheberligi bar, segiz qyrly bir syrly dep aıtýymyzǵa bolady, – deıdi Qazaqstannyń eńbek sińirgen qaıratkeri, sýretshi Januzaq Músápir.
Biz tamashalaǵan kórme erekshelikke toly. Ár sýret ózine jeke qaraýǵa, oı kózimen úńilýge májbúrleıdi. Máselen, «Mahabbat trılogııasy» sýreti áıeli Galaǵa arnalǵan. Talaı talanttyń shabytyn shaqyrǵan Gala sulý alǵash kórgennen-aq sýretshiniń júregin baýraıdy. Astrologııa, mıstıkany unatqan erekshe áıeldiń sulbasy taro kartalarynyń beınesi arqyly salynǵan. Sýrette eki ǵashyqtyń arman-tilegi, qupııa syrlary ártúrli boıaýlar arqyly sheber berilgen.
Salvador Dalı – qoǵamdyq oıǵa túren salǵan birden-bir óner ıesi. Ol qalyptasqan túsinikterdi buzyp, bolmys-bitimimen jańa baspaldaqqa shyqty, jańa qurlyq ashty. Qaıda júrse de sensasııalyq áreket jasap, ereksheligin aıqyn tańbalap júrdi. Iá, el arasynda tentek talant atanǵan alyptyń murasy – ómirsheń. Buǵan zaman men buqara kýáger. Elordamyzda aı sońyna deıin úzdiksiz jalǵasatyn óner merekesine kelýshilerdiń qarasy arta bereri daýsyz.
