KО́KShETAÝ. 27 sáýir. «Kókshetaý» mádenıet saraıynda «Nur Otan» partııasy Aqmola oblystyq fılıalynyń uıymdastyrýymen jeńimpazdar forýmy ótkizildi. Merekelik is-sharanyń shymyldyǵy «Dostar» trıosynyń oryndaýyndaǵy «Qazaq eli osyndaı!» ánimen ashyldy. Zal patrıottyq rýhty asqaqtatar ánge tik turyp qosyldy. Bul týraly egemen.kz tilshisi habarlady.
Jıyndy júrgizýshiniń: «Qymbatty dostar! Keshe ǵana bizdiń elimizde tarıhı mańyzdy oqıǵa – Qazaqstan Respýblıkasy Prezıdentiniń saılaýy ótti. Munda barsha qazaqstandyqtardyń úlken senimine ıe bolǵan bizdiń Elbasy Nursultan Ábishuly Nazarbaev úzdik shyǵyp, jeńiske jetti. Bul – bizdiń jeńis!», – degen sózderi záýlim saraıdy «Alaqaı» daýysqa bóledi.
Odan keıin tórge ilingen ekrannan Elbasy eńbeginiń tálimdi joldarynan úzindiler, Qazaqstannyń tabysty qadamdary, álemdik abyroıy beınelengen kórinister, aqmolalyqtardyń keshegi saılaýdaǵy belsendiligin aıshyqtaǵan túsirilimder kórsetildi. Án-bı áýezi, qýanyshty quttyqtaýlar kóńil qaınaryn tasytyp turdy.
Sóz Qazaqstan Respýblıkasy Prezıdentiniń senimdi ókili, Prezıdenttikke úmitker Nursultan Nazarbaevty qoldaý jónindegi oblystyq shtab tóraǵasynyń orynbasary Serik Aıaǵanovqa berildi. «Keshegi 26 sáýir kúni biz Táýelsiz Qazaqstan jylnamasyndaǵy taǵdyrsheshti saıası mańyzdy tańdaýymyzdy jasadyq. Men jerlesterimdi úmitkerimizdiń saılaýdaǵy laıyqty ári biz kútken jeńisimen quttyqtaımyn. Bul jeńis bolashaǵymyzdy, táýelsiz Qazaqstannyń bolashaǵyn aıqyndaıdy. Bul barshamyzdyń, qazaqstandyqtardyń ortaq jeńisi. Osy oraıda, aqmolalyqtarǵa Nursultan Nazarbaevqa óziniń basym daýysyn, ıaǵnı, 98 paıyzǵa jýyq daýysyn bergenine rızashylyǵymdy bildiremin. Bizdiń baǵytymyz aıqyn, bolashaǵymyz jarqyn! Bizdiń qýatymyz – birlikte! Elbasymen birge jańa jeńisterge jete bereıik!»,-dedi ol.
Jeńimpazdyq forýmdary oblystyń barlyq aýdandarynda da ótkizildi.
Baqbergen Amalbek.
Derek, sýret: egemen.kz
