Sýret: inbusiness.kz
Pavlodar qalasynyń aýlalaryndaǵy konteınerlerden kúnine myńdaǵan tonna qoqys jınalady. Bılik turmystyq qatty qaldyqtardy suryptap, jınaý tásiline kóshýdi oıǵa aldy. Bul úshin qaldyqtar tógiletin polıgonda arnaıy zaýyt qurý jobasy bastalyp ketti.
– Shaharda eski qoqys konteınerlerin eýrokonteınerlerge aýystyrý jobasy jalǵasyp jatyr. Byltyr qoqys tógýge arnalǵan 800 eýrokonteıner satyp alǵan edik. Bıyl Hımqalashyq shaǵyn aýdanynan bastap 133 zamanǵa saı konteınerdi ornalastyrdyq. Bul úshin konteıner ydystardy qoıýǵa arnalǵan alańdar quıyldy. Jyl sońyna deıin qosymsha shamamen 1 myń eýrokonteıner satyp alamyz degen jospar bar, – dep málimdedi qalalyq ákimdikten.
Jańa qoqys konteınerlerine «Spesmashın» JShS jańadan 18 qoqys tasıtyn mashına satyp alǵan. Qalada qoqysty suryptaý zaýytynyń jobasy iske asa bastady. Ol turmystyq qatty qaldyqtar tastalatyn polıgon aýmaǵynda ornalasady. Jobaǵa sáıkes kásiporynda tústi jáne qara metaldar, karton, polıetılen, plastık qaldyqtary, rezeńke, aǵash, toqyma-mata ónimderi, shyny qaldyqtary jeke-jeke jınalady.
Osydan birneshe jyl buryn shahar bıligi qala turǵyndaryna jaqyn arada qoqysty bólek-bólek jınaý ádisi engiziledi dep ýáde etken. Olardyń josparynsha suryptalyp alynǵan qurǵaq qaldyqtar men plastıkter qaıta óńdelip, al organıkalyq qaldyqtar joıylýǵa tıis edi. Alaıda belgisiz sebeptermen joba sóz júzinde qalyp qoıdy. Arnaıy baǵdarlama da bolmaı, bul jumysty kezinde «Operator ROP» kompanııasy júrgizedi degen sybys ta shyqqan. Osylaısha, búginde Pavlodarda eýrokonteınerler men eýropalyq standarttaǵy arnaıy qoqys kólikteri bar da, eýropalyq ádispen qoqys jınaý, óńdeý isi joq. Aldaǵy ýaqytta joba tolyqqandy júzege asady degen senim zor.
О́ńirlik jer qoınaýyn paıdalaný, qorshaǵan orta jáne sý resýrstary basqarmasynyń málimetinshe, qazirgi ýaqytta oblystaǵy birneshe eldi meken polıgondar qurylysynyń jobalyq-smetalyq qujattaryn keshendi saraptamadan ótkizip jatyr. Atap aıtqanda, Tereńkól, Ertis, Baıanaýyl, Maıqaıyń kentterinde buǵan mańyz berilgen. Basqarma basshysynyń orynbasary Dııar Qaıyrkenovtiń aıtýynsha, olar keıinnen qoldanystaǵy polıgondardy rekýltıvasııalaý arqyly qatty turmystyq qaldyqtar polıgondaryn qurýdy kózdep otyr. Sonymen qatar oblys ákimdiginiń jobalar pýlyna Pavlodar qalasynda qaldyqtardy óńdeý kesheniniń qurylysy engizildi.
– Qalalar men aýdandarda konteınerlerdi satyp alý, ornatý jumystary úzdiksiz júrgizilip jatyr. Búginde oblys boıynsha 2,5 myńnan asa konteıner ornatyldy. Onyń ishinde plastık qaldyqtardy jınaýǵa arnalǵan 891 konteıner, qaldyqtardyń qaýipti túrlerin jınaýǵa arnalǵan 200 konteıner (quramynda synap bar shamdar úshin) bar. Pavlodar, Aqsý, Ekibastuz qalalarynda, sondaı-aq jeti aýyldyq aýmaqta turmystyq qaldyqtardy basqarýdyń jeke baǵdarlamasy ázirlendi. Bul strategııalarǵa qatty turmystyq qaldyqtar polıgondaryn, qaıtalama shıkizatty jınaý pýnktterin salý, qatty turmystyq qaldyqtardy suryptaý men óńdeýge arnalǵan jabdyqtardy alý, jańa konteınerler men qoqys shyǵaratyn kólikter satyp alý kiredi, – deıdi basqarma ókili.
Pavlodar oblysy
