Prezıdent aldaǵy ýaqytta shuǵyl qolǵa alynyp, atqarylýǵa tıis toǵyz jumys baǵytyn atap aıtty. Onyń qaı-qaısysy bolsyn, eldiń erteńine ózekti, ýaqyt suranysynan týyndap otyrǵan kún tártibindegi máseleler. Máselen, aqsha-nesıe saıasaty men fıskaldy saıasattyń arasyndaǵy úılesimsizdik, ınvestısııalyq ahýaldy jáne bıznes júrgizýge qajetti jaǵdaıdy jaqsartý, elimizdiń ónerkásip áleýetin tolyq paıdalaný, ınfraqurylymǵa qatysty ózekti máselelerdiń bári de aldaǵy ýaqytta jańasha qarqynmen qolǵa alynyp, óz sheshimin tappaq.
Prezıdent eldiń ál-aýqatyn kóterýge únemi jiti kóńil bólip keledi. Sondaı-aq ult densaýlyǵyn nyǵaıtý men áleýmettik qoldaý júıesin jańǵyrtýdyń mańyzdylyǵyn atap ótti. Joldaýda 2025 jyldan bastap «Áleýmettik ámııandy» engizý arqyly áleýmettik qoldaý tetikterin qaıta qaraý mindeti qoıylyp otyr. Bul halyqtyń muqtaj toptaryna barynsha ataýly jáne naqty kómek kórsetýge múmkindik bermek. Shyn mánindegi muqtaj jandar memleket tarapynan turaqty qoldaý tabady. Bul óz kezeginde áleýmettik ádilettilikti arttyryp, turǵyndardyń ómir súrý sapasyn jaqsartady.
Sonymen qatar Joldaýda memlekettik basqarýdyń tıimdiligin arttyrýǵa da kóp kóńil bólingen. Buǵan bıýrokratııalyq prosedýralardy qysqartý, basqarýdyń barlyq deńgeıinde zamanaýı basqarý ádisterin engizý kiredi. Sıfrlandyrý jáne ınnovasııalardy engizý memlekettik apparat jumysynyń tıimdiligin aıtarlyqtaı arttyrmaq.
Joldaýdyń árbir bóliminde sıfrlandyrý quraldary arqyly salalyq saıasatty iske asyrý tıimdiligin arttyrý máselesi qozǵalǵanyn aıta ketý kerek. Olar – salyqtyq ákimshilendirýdi sıfrlandyrý, joldarǵa ıntellektýaldy júıelerdi engizý, biryńǵaı medısınalyq aqparattyq júıe qurý, «elektrondy úkimet» platformasyna jasandy ıntellekt tehnologııalaryn engizý syndy tyń bastamalar.
Joldaýda kóterilgen taǵy bir mańyzdy baǵyt – qoǵamda zańdylyq pen tártipti nyǵaıtý máselesi. Tynyshtyǵy ketken elde damý da, órkendeý de bolmaıdy. Birligi jarasqan, qaýipsiz qoǵamda ǵana bıznes gúldenip, ekonomıkanyń ósýi qarqyn alady. Bul memlekettik saıasatymyzdyń basym baǵyttarynyń biri bolyp qala beredi. Azamattardyń quqyqtaryn qorǵaýǵa jáne qoǵamnyń árbir múshesiniń jaýapkershiligin arttyrýǵa baǵyttalǵan naqty jáne ádil erejelerdi engizý – turaqty damýdyń negizi.
Atom elektr stansasyn salý – elimizde kópten kóterilip júrgen taqyryptardyń biri. El turǵyndary buryn AES máselesine úrke qaraǵan bolsa, sońǵy jyldary energııa tapshylyǵynyń anyq biline bastaýyna baılanysty bul qýat kóziniń kerek ekenin túsindi. Túrli sarapshylar qazir halqymyzdyń basym bóligi AES qurylysyn qoldaıtynyn aıtady. Degenmen Prezıdent Q.Toqaev «Halyq únine qulaq asatyn memleket» tujyrymdamasyn negizge ala otyryp, respýblıkalyq referendým ótkizýge sheshim qabyldady. Bul elge kerek másele, sondyqtan ol týraly sońǵy sheshimdi de halyqtyń ózi qabyldaýǵa tıis. Endeshe, azamattarymyz belsendilik tanytyp, 6 qazan kúni bir kisideı referendýmǵa qatysyp, daýys bergenderi jón.
Prezıdenttiń keler jyldy Jumysshy mamandyqtary jyly dep jarııalaýy – eldiń bolashaǵyn oılaǵannan týǵan bastama desek artyq emes. Shyn máninde bizde qarapaıym, biraq qoǵamǵa eń qajetti mamandar tapshy. Elimiz dánekerleýshiden bastap kran mashınısine deıingi sapaly kadrlarǵa muqtaj. Memleket basshysy 2019 jylǵa deıin orta bıznestiń ekonomıkadaǵy úlesin 15 paıyzǵa jetkizýdi mindet etip qoıdy. Al bul mejege bizdi joǵaryda atalǵan jumysshy mamandar jetkizeri anyq. Sondyqtan Memleket basshysynyń bul bastamasy da el ómirine serpin ákelip, jastarymyzdyń óz bolashaqtaryn durys tańdaýyna septigin tıgizedi dep úmittenemiz.
Jalpy aıtqanda, Joldaýda aıtylǵan árbir oı – Ádiletti Qazaqstandy qurý jolyndaǵy mańyzdy qadamǵa aınalary haq. Ol úshin elimizdiń ár azamaty bul úderisten shet qalmaı, bolashaǵymyzdy óz qolymen jasaýǵa atsalysýǵa tıis.
Almas Kádirbekuly,
jýrnalıst
