Eptilik pen mergendik synalatyn jamby atý saıysyna 27 memleketten 78 sportshy qatysyp jatyr. Sportshylar 11 topqa bólinip, dodaǵa tústi.
Jamby atýdyń majar stıli boıynsha ótken saıysta Fransııa mergeni Rafael Malet chempıon atandy. Kúmis medal mońǵolııalyq Altyngýıah Nergýıge buıyrsa, qola júldeni Malettiń otandasy Gaten Blo enshiledi. Ulttyq qurama múshesi Abzal Tulybekov besinshi oryndy mise tutty.
«Majar stıliniń ereksheligi – sportshy atpen júıtkip kele jatyp, nysanaǵa kóp oq tıgizý kerek. Jebe sanyna shekteý joq. Kóshpeliler oıyndaryna ulttyq qurama músheleri tyńǵylyqty ázirlik júrgizdi. Majar stılinen medal buıyrmaǵany ókinishti. Jyl basynan beri tórt oqý-jattyǵý jıynyn ótkizip, ár mergenniń jeke daıyndyǵyna kóńil bólip, taktıkalyq jospar boıynsha sheberligin shyńdadyq», dedi Jamby atýdan Qazaqstan ulttyq quramasynyń bas bapkeri Eldos Badashev.
El quramasy sapynda Aıtbek Sarybaı, Eralhan Aıkóz, Batyr Beksaýyt, Abzal Turlybekov baq synaıdy. Sportshylarymyz buǵan deıin álem, Eýropa chempıonattarynan júldeli oralyp, mereıimizdi tasytqan edi. Mergenderimiz áli Azııa, túrik, qazaq stılderi boıynsha tartysqa túsedi.
