«Arystan» mamandandyrylǵan lıseıiniń bastyǵy, general-leıtenant Murat Maıkeev oqý ornynyń jabdyqtalýy, tárbıelenýshiler úshin bos ýaqyttyń uıymdastyrylýy, sporttyq is-sharalardy ótkizý úshin jasalyp jatqan ózgeris týraly aıtyp berdi.
Qorǵanys mınıstri Rýslan Jaqsylyqov kazarmaǵa, oqý kabınetterine, atys tırine, boks jáne basqa da sport túrlerimen aınalysýǵa arnalǵan sport zaldarynda boldy. Tárbıelenýshiler arasynda júzýden ótken jarysqa qatysqan jeńimpazdar men júldegerlerdi marapattady.
Kezdesýde jas jetkinshekterge Qarýly kúshterdiń ár túrindegi qyzmet erekshelikterine qyzyǵýshylyq tanytyp, osy turǵyda mamandyqqa barý jáne ofıser retinde qalyptasý týraly suraqtar qoıdy.
– Bizdiń otbasymyzda áskerı adam bolǵan joq. Ákem – merzimdi áskerı qyzmette bolǵan kisi. Odan soń kóp jyldar boıy aýyl sharýashylyǵynda eńbek etti, al anamyz muǵalim bolyp jumys istedi. Men júrek qalaýymen áskerı ýchılısheni tańdadym. Qyzmette árdaıym sportpen shuǵyldanýǵa múmkindik boldy. Qyzmetti motoatqyshtar vzvodynyń komandırinen bastaǵan ýaqytta general bolam degen oı úsh uıyqtasam, túsime kirmepti. О́z mindetimdi adal oryndaýym, qıyndyqtarǵa moıymaýym meni osy jetistikterge jetkizdi. Men sizderge árdaıym tabandy bolyp, maqsattaryńyzdy aıqyndap, sportpen shuǵyldanýǵa keńes beremin. Sonda mindetti túrde jetistikke jetesizder, – dedi ol jas «arystandyqtarǵa».
General-polkovnık Otanǵa qyzmet etý qurmetti de qasıetti paryz ekenin atap ótip, olardy Qarýly kúshter qataryna qosylýǵa shaqyrdy. Jastarǵa áskerı ınstıtýttarǵa túsý sharttary, lıseıde oqyǵannan keıin ıgere alatyn áskerı mamandyqtar, onyń ishinde sheteldik áskerı oqý oryndarynda jáne áskerde qyzmet etkennen keıingi jeńildikter týraly aıtyp berdi.
Kezdesý sońynda lıseı tárbıelenýshileri óz kúshimen daıyndaǵan konsert berip, estelik sýretke tústi.
