Sýretterdi túsirgen: Erlan Omar «EQ»
«Qazanat» ıppodromy mańyndaǵy aýmaǵy at shaptyrym aýylda sporttyq saıys ótetin alańdar, sheberler qolynan shyqqan buıymdar kórmesi, «О́ner ordasy» atty bas sahna, ulttyq taǵamdardyń dámin tatýǵa arnalǵan fýd-korttar men seıil-serýen qurýǵa qolaıly aımaqtar jasaqtalǵan. О́tken men búginniń beınesi erekshe úılesim tapqan aýyldy aralaı júrip elimizdiń óshpes órkenıetine eriksiz tamsanasyń. Biz keshken bul kúıdi bar kelýshiler boıynan ótkizip jatqany anyq. Sebebi jınalǵandar kıiz úıler aldyndaǵy sahnalyq kórinisterdi yntyzarlyqpen tamashalap, án-jyrdy yqylaspen qosyla shyrqap jatyr.
«Halqymyz «myń ret estigennen bir ret kórgen artyq» dep aıtyp jatady ǵoı. Sol qaǵıdamen búgin otbasymyzben etnoaýylǵa keldik. Kórer qyzyq kóp eken. Aýyldyń tııanaqty retpen jasaqtalǵany kóńilimnen shyǵyp jatyr. Myna kıiz úıler aımaqtardyń bar asylyn Astana tórinde pash etip tur. Oblystardan tabylǵan jádigerler zamanaýı led-ekrandarda kórsetilip jatyr. Qazirdiń ózinde Mańǵystaý, Almaty oblysy, Shyǵys Qazaqstan men Almaty qalalarynyń kıiz úılerine bas suqtym. Almaly shahardyń sımvolyna aınalǵan alma aǵashtaryn, sol almany kórsetýdegi estetıkalyq sheshimi qatty unady», deıdi Astana qalasynyń turǵyny Aıgúl Ikramjan.
Al bas sahnada bul kúni Aqmola oblysynan kelgen 200-den asa jas daryn men óner ujymdary Arqanyń án-kúıimen qulaq quryshyn qandyryp jatty.
«Búgin Kókshetaý qalasy, Aqmola oblysynyń barlyq aýdany men Qosshy qalasynan jınalǵan dástúrli ánshiler, estrada ánderin oryndaýshylar, «K.Kúmisbekov» atyndaǵy ulttyq aspap orkestri men «Gákký» bı ansambli, «Ulan ǵasyr» kvarteti daıyndaǵan kesh ótip jatyr. Aqmola oblysynan ataǵy darhan dalany sharlaǵan óner alyptary týǵan. Sonyń biri – Úkili Ybyraı. Sondyqtan búgingi konsert shymyldyǵyn Úkili Ybyraı babamyzdyń ánimen túrdik. Aqmola oblysynyń ár aýdanyndaǵy mádenıet úılerinen basy qosylǵan 150 dombyrashy búldirshin kórsetken óner halyq eńsesin kóterip, rýhtandyrǵany erekshe sezildi», dedi ánshi, akter, Aqmola oblysy Selınograd aýdanyndaǵy Mádenıet úıiniń ánshisi Baýyrjan Nurymbetov.
Etnoaýylǵa taban tiregen qonaqtar, V Dúnıejúzilik kóshpeliler oıyndaryndaǵy sporttyq saıystarǵa qatysýshylar men sheteldik týrısterdiń qazaqtyń ulttyq qolónerine degen qyzyǵýshylyǵy joǵary. Ár dúńgirshekte saýda da qyz-qyz qaınap jatyr. Aqmola oblysynyń temirden túıin túıgen, teri ılegen, on saýsaǵynan óner tamǵan sheberleri de orta toltyrǵan. Kókshetaý qalasyndaǵy «Granat» shyǵarmashylyq mektebinde tálim alyp jatqan oqýshylardyń qolynan shyqqan buıymdar kórmege arnaıy jetkizilgen. Balalardy kórkem sýret óneriniń qyr-syryna baýlıtyn mektep qysh qumyra men qazaqy naqyshpen kómkerilgen jeıde, shopper, taqııa, shapannyń san alýan túrin saýdaǵa shyǵarǵan.
«Bizdiń shyǵarmashylyq mektep 2016 jyldan beri oqýshylardy qolóner buıymdaryn jasaýǵa baýlyp júr. Astanaǵa alyp kelgen buıymdarymyzdy 10-16 jas aralyǵyndaǵy oqýshylar ázirlegen. Kıimderdegi prıntter kásibı sýretshilerdiń qylqalamynan týǵan. Shákirtterimiz sýretshilermen kollabarasııa jasaı otyryp, júrek qalaýyndaǵy buıymdardy isteıdi. Tehnıkalyq ashylýdan beri etnoaýylda qyzmet kórsetip turmyz. Sheteldik týrıster «World nomad games-tiń» logotıpi beınelengen dúnıelerdi kóptep satyp alyp jatyr», dedi «Granat» shyǵarmashylyq mektebiniń negizin qalaýshy Anar Sáttibaeva.
«Kóshpeliler álemi» aýylyndaǵy etnoshatyrda aty qalyptasqan otandyq kádesyı brendterimen qatar, oblys iskerleriniń buıymdary da kóz tartady. Mańǵystaý oblysy Aqtaý qalasynan kelgen jergilikti sheberler odaǵynyń múshesi - Baqyly áje kórmege kıiz úıdiń ishin jasaqtaýǵa arnalǵan baý-basqur, shashaq-qurlaryn alyp kelgen. 15 jasynan baý toqyp, kıiz basýdy meńgergen áje áýestenetin isin búginde nemerelerine úıretýdi qolǵa alǵan.
«Jastyq shaqtan alǵan úlgimiz jadymyzda jattalyp qalǵan. Memlekettik qyzmette júrgende de qolónerden qol úzbedik. Ala jipten ádiptelgen baýlarǵa óz óńirimizde suranys joǵary. Al osyndaǵy Mańǵystaý oblysynyń úsh kıiz úıi bizdiń buıymdarmen ásemdeldi. Kórmege qoıylǵan buıymdardy úıde isteımiz, búginde nemerelerim monshaǵyn ótkizip qolǵabys jasaıdy», dedi Baqyly Bopanaıova.
Elordada ótip jatqan kóshpeliler oıyndarynyń sporttyq saıystarynda 89 elden kelgen qatysýshylar baq synap júr. Demek, keminde shartaraptyń 89 memleketine kóshpeliler oıynynyń dúbiri estilip jatyr. Etnoaýyldy aralaı júrip Túrkııanyń bedeldi tele-radıo kesheninen kelgen áriptesterimizdi keziktirdik. Qyzý jumys arasynda «TRT» tilshisi Eskender Mametovten qandaı aqparat taratyp jatqanyn suradyq.
«Biz Túrkııadan arnaıy keldik. Astanadaǵy kóshpeliler oıyndary qatty unap jatyr. Qazir sporttyq jarystar men etnoaýyldaǵy folklorlyq qoıylymdar týraly reportaj, halyq oıyndary týraly habar daıyndap jatyrmyz», deıdi Eskender Mametov.
Kóńildi qýantqany - etnoaýylda top-top sheteldik týrıster júr. Biz tildesken úndistandyq Indejıt Sınh myrza Qazaqstanda ótip jatqan kóshpeliler oıyndaryna amerıkalyq dostarymen birge kelipti.
«Dúnıejúzilik kóshpeliler oıyndary - ǵajaıyp is-shara. Astanaǵa álemniń túkpir-túkpirinen myńdaǵan adam kelse eken deımin, óıtkeni qazir eldiń baı mádenıeti jaqsy tanystyrylyp jatyr. Qazaqtardyń óz mádenıetin maqtan tutatynyn kórip jatyrmyz. Sporttyq oıyndar men mádenı is-sharalardyń bir ýaqytta, jaqyn mańda ótip jatqany sizderdiń mádenıetterińizben jaqynyraq tanysýǵa jaqsy múmkindik berip jatyr. Intellektýaldy, kúshtik oıyndar óte qyzyq ótip jatyr. Keleside ótetin kóshpeliler oıyndaryna taǵy kelemiz», dedi Úndistannan kelgen týrıst.
Astanany dúbirge bólep jatqan kóshpeliler oıyndary men «Kóshpeliler álemi» atalatyn etnoaýyldaǵy toı-dýman 13 qyrkúıekke deıin ótedi. Etnoaýyl jumysy 11:00-den bastalyp, 21: 00-de aıaqtalady.
