Urlyq bir emes, birneshe ret qaıtalanǵan. Jábirlenýshilerdiń biriniń aıtýynsha, ol úıdiń aýlasynda otyrǵanda belgisiz adam oǵan jaqyndap, ózin «Sý arnasynyń» qyzmetkeri retinde tanystyryp, eseptegishterdi tekserý kerek ekenin aıtqan. Áıel adam qyzmetkerge senip, oǵan páteriniń kiltin bergen. Alaıda keıinirek úıge kelgende zergerlik buıymdary bar qoraptyń joǵalyp ketkenin baıqaǵan. Shyǵyn somasy shamamen mıllıon teńgeni qurady. Ol – О́skemendegi jalǵan kommýnal qyzmetkerinen zardap shekken jalǵyz adam emes.
Kelesi joly kúdikti elektrık róline enip, 72 jastaǵy oblys ortalyǵy turǵynynyń esigin qaqqan. Onyń eseptegishteri men symdaryn tekserip, qyzmet aqysyn suraǵan. Áńgime arasynda ájeni alańdata otyryp, onyń 140 myń teńgesin urlap ketken.
Úshinshi jaǵdaı, 87 jastaǵy jábirlenýshige «kommýnaldyq qyzmetker» onyń eseptegishterinde aqaý tapqanyn, eger oǵan 1 000 teńge tólese, ol bul týraly habarlamaıtynyn aıtqan. Sóıte tura, páterden shyǵyp bara jatyp, zeınetkerdiń sómkesin urlap ketken. Sómkede 25 myń teńge bolypty.
Kóp uzamaı, polıseıler kúdiktini anyqtap, ustady. Ol buryn urlyq jasaǵany úshin birneshe ret sotty bolǵan 39 jastaǵy О́skemen qalasynyń turǵyny bolyp shyqty. Kúdiktiniń aıtýynsha, ol qalanyń aýlalarynda egde adamdardy baıqap, keıinirek onyń «qyzmetterine» aqy tólep jatqanda, olar qolma-qol aqshany qaıda saqtaıtynyna kóz júgirtken. Aıtqandaı, er adam urlanǵan zergerlik buıymdardy satyp úlgergen. Keıin ony polıseıler tárkilegen. Qazirgi ýaqytta kúdikti qamaýǵa alyndy. Tártip saqshylary buryn jasalǵan uqsas qylmystarǵa qatystylyǵyn anyqtap jatyr.
Tártip saqshylary qala turǵyndarynan qyraǵy bolýdy jáne kúdikti adamdardy úıge kirgizbeýdi suraıdy. Al kommýnaldyq qyzmetkerlerden qujattaryn suraýǵa quqyly. Eger kimde-kim osyndaı qylmystyq áreketterden zardap shekken bolsa, dereý «102» arnasyna habarlasýlary qajet.
О́SKEMEN
