Sýret: sputnik.kz
Joldaýda «búgingi zaman talabyna saı keletin oqý oryndaryn qoldaýǵa, árbir grant quny jastardyń sapaly bilim alýyna qolaıly jaǵdaı jasaýǵa tıis» dep kórsetildi. Odan ári «óz kásibin jetik meńgergen adamdar ult sapasyn arttyrady. Ustazdar bilimdi urpaq tárbıeleý arqyly elimizdiń órkendeýine jol ashady. Sondyqtan, pedagogıkalyq joǵarǵy oqý oryndaryna talapty, qabiletti jastardy qabyldaýǵa basa mán berý kerek. Bul baǵyttaǵy jumystardyń bet alysy jaqsy, ony jalǵastyrý qajet» delingen.
Álemdik tájirıbede erekshe qabiletti, talantty balalarǵa sapaly bilim berýmen, Eýropa elderinde arnaıy mamandandyrylǵan mektepter aınalysady. Olar ǵasyrlar boıy adamzatqa qyzmet etip, tájirıbe jınaqtaǵan, teorııalyq jaǵynan da júıege kelgen oqý oryndary.
Bizde egemendik alǵan soń ǵana, ótken ǵasyrdyń 90-jyldarynan bastap jańa tıpti mektep-lıseı, gımnazııa, daryndy balalar mektepteri qurylyp, qarqyndy jumys isteı bastady. Olar talantty da qabiletti balalardy bólek oqytyp, sapaly bilim berýde ájeptáýir joǵary kórsetkishke qol jetkizdi.
Solardyń biri – Batys Qazaqstan oblystyq mamandandyrylǵan daryndy balalar mektebi edi.
Shırek ǵasyr boıy oblystyq daryndy balalar mektebi mektep mártebesine sáıkes elıtarlyq bilim berdi. Onyń úzdik kórsetkishke jetýine negiz bolǵan – tómendegi álemdik ınnovasııalyq tájirıbeler edi.
Eń aldymen, mektep múlde tyńnan, joǵary pedagogıkalyq oqý ornynyń ǵylymı-ádistemelik, materıaldyq negizinde quryldy, ınstıtýttyń rektory professor Tuıaqbaı Rysbekov joǵary oqý ornynyń ǵylymı-ádistemelik bazasyn oqýshylarǵa stýdenttermen birdeı paıdalanýǵa tolyq múmkindik jasady.
Sonymen qatar synypta oqýshynyń qabilet-qyzyǵýshylyǵyna qaraı biryńǵaı beıindi bilim berýde jekelegen pánder tereńdetilip oqytylatyn anglo-saksondyq jáne ár oqýshynyń shyǵarmashylyq jeke-dara qabiletin damytý baǵytyndaǵy fınlıandııalyq júıe júzege asyryldy. Bul baǵyttar bizdiń jaǵdaıymyzda da óziniń erekshe tıimdiligin kórsetti. Oqytý úrdisin ár oqýshynyń qabilet-múmkindigine qaraı júrgize otyryp, beıindi bilim berý modelin júzege asyrýǵa qolaıly bolyp shyqty. Mektepte birden Fransııa, Germanııa, Qytaı elderindegi tańdaý jáne mindetti pánderdi jan-jaqty meńgertýde, oqýshylardyń kúrdeli de kólemdi teorııalyq turaqty ınnovasııalyq saýatyn damytýdaǵy laboratorııalyq-praktıkalyq materıaldardy qosarlanǵan sabaq arqyly júzege asyrý qolǵa alyndy. Ol barǵan saıyn ádistemelik jaǵynan jetildirilip, sapaly bilim berýdiń basty faktoryna aınaldy. Bilim standartyn oqýshylardyń júıeli, turaqty meńgerip otyrýyn qamtamasyz etýde japondyq bilimdi baqylaýdyń monıtorıngtik ádisterine erekshe mán berildi.
Bilimdi baqylaýdyń birtutas japondyq monıtorıngtik júıesi oqýshynyń bilim alý, muǵalimniń bilim berý úrdisi deńgeıin kúndelikti, toqsandyq, jyldyq turaqty baqylaý arqyly ár oqýshynyń bilimdi sapaly meńgerýin qamtamasyz etken eń bir ınnovasııalyq tásil boldy. Osy negizde daryndy balalarǵa arnalǵan mekteptiń túlekteri sońǵy ondaǵan jyl boıy qatarynan joǵary oqý oryndaryna grantpen 100 paıyz qabyldanyp otyrdy. Júz paıyz! Bul – buǵan deıin respýblıkada bolmaǵan kórsetkish. 150-den astam shákirtimiz «Bolashaq» baǵdarlamasy boıynsha álemniń eń tańdaýly ýnıversıtetterinde, 20-dan astamy V.Lomonosov atyndaǵy Máskeý memlekettik ýnıversıteti janyndaǵy A.Kolmogorov mektebinde bilim aldy.
Bir ókinishtisi, búginde osy ozyq tájirıbe óz dárejesinde damı almaı otyr. Joldaýda Memleket basshysy qabiletti jastarǵa sapaly bilim berýdegi álemdik ozyq tájirıbelerdi óz dárejesinde jalǵastyrý qajettigin aıtty. Biz osydan úmit etemiz.
Násipqalı DÁÝLETOV,
pedagogıka ǵylymdarynyń kandıdaty, professor
