Sýretti túsirgen – Erlan OMAR, «EQ»
«Jamby atý» jáne «Arqan tartys» ulttyq sport túrleri federasııasynyń prezıdenti Erkebulan Ilııasovtyń aıtýynsha, arqan tartys sportyna álemde qyzyǵýshylyq artyp keledi. Negizi mundaı sport túri dúnıe júzindegi basqa da halyqtarda burynnan bar. Árkim ony óz tilinde ataıdy. Degenmen bizdiń bastamamyzben bıyl ol qazaqtyń ulttyq sport túri retinde kóshpeliler oıyndary baǵdarlamasyna enip otyr.
Sonymen erler arasynda bul synda Ulybrıtanııa, О́zbekstan, Reseı, Qyrǵyzstan, Pákistan jáne Qazaqstan quramalary ózara kim myqtyny anyqtasa, qyzdar arasynda Reseı, Qyrǵyzstan, О́zbekstan jáne Qazaqstan arýlary tartysty básekeler ótkizdi.
Dúnıejúzilik kóshpeliler oıyndaryndaǵy naǵyz delebeni qyzdyrǵan saıystardyń biri de osy arqan tartys boldy. О́ıtkeni ásirese qazaq quramasy alańǵa shyqqanda «Alaý» saraıyna jınalǵan kórermender dý qol shapalaqtap, óz sportshylaryn qoldaǵanda shynymen keýdeni maqtanysh sezimi kernedi. Mine, osy qoldaý da bizdiń qyzdarymyz ben jigitterimizge jiger berip, demep otyrǵanyna shúbá joq.
Qara kúsh ıelerinen quralǵan jigitter quramalary synynda jartylaı fınalǵa Qazaqstan, Qyrǵyzstan, Reseı jáne Pákistan sportshylary shyqty. Bul joly qazaq jigitteri pákistandyqtardy qapy qaldyryp, fınalǵa shyqsa, reseılikter aıyr qalpaqty aǵaıyndardyń jolyn qıdy.
Osy kúni tústen keıin aldymen Qyrǵyzstan men Pákistan quramalary 3-oryn úshin talasyp, atysty básekede Alataýdyń ar jaǵynan kelgen baýyrlas eldiń baǵy jandy. Olar – jarystyń qola júldegeri.
Al fınaldyq aıqas tikeleı maǵynadaǵy taban tiresken tartyspen este qaldy. Alǵashqy básekede bastapqy bes mınýttaı eki jaq ta bir-biriniń qatelesýin baǵyp, artyq qımyl jasaǵan joq. Bir ýaqytta shalt qımylmen iske kirisken reseılikter, ókinishke qaraı, bizdiń jigitterdi op-ońaı súırep áketti. Esep 1:0. Bul kórinisten keıin altyn medaldan úmit úzilgendeı bolǵan. Alaıda ekinshi tartysta bizdiń saıypqyrandar kópke sozbaı, reseılikterdi ońaı súırep, jeńiske jetti. Sonymen esep teńesti.
Sońǵy sheshýshi sátte qazaq jigitteriniń baby saı bolǵanymen, sáttilik jetispeı qaldy. Eki jaq ta altyn medal qol sozym jerde turǵanyn túsinip, baryn salyp aıqasyp, qara terge malshyndy. Biraq bul joly reseılikterdiń joly bolyp, kóshpeliler oıyndarynyń chempıony atandy. Bizdiń jigitterde – kúmispen kúptelgen medal.
Qyzdar básekesinde de dál osyndaı jaǵdaı qaıtalandy. Jartylaı fınalda súringen О́zbekstan men Qyrǵyzstan quramalaryna qola medal berilse, altyn júldeni taǵy da Reseı men Qazaqstan arýlary sarapqa saldy. О́kinishke qaraı, bul joly da reseılikterdiń baǵy janyp, Dúnıejúzilik kóshpeliler oıyndarynyń jeńimpazy atandy.
Sonymen arqan tartys básekesi óz máresine jetti. Qazaqstan qorjynynda – qos kúmis. Ulttyq sportymyzdyń mereıin asqaqtatyp, álemge tanylýyna óz úlesin qosqan sportshylarymyzdyń jeńisti kúnderi áli de alda.
